-
ବର୍ଷେ ମଧ୍ୟରେ ୧୦ ଲକ୍ଷ ଯୁବପିଢ଼ିଙ୍କୁ ଆପ୍ରେଂଟିସ୍ସିପ୍ ଫ୍ରେମୱାର୍କ୍ ସହ ଯୋଡ଼ିବା ଲକ୍ଷ୍ୟ -ଧର୍ମେନ୍ଦ୍ର ପ୍ରଧାନ
ନୂଆଦିଲ୍ଲୀ/ଭୁବନେଶ୍ୱର, ଆଗାମୀ ୧ ବର୍ଷ ମଧ୍ୟରେ ୧୦ ଲକ୍ଷ ଯୁବପିଢ଼ିଙ୍କୁ ଜାତୀୟ ଆପ୍ରେଂଟିସ୍ସିପ୍ ଫ୍ରେମୱାର୍କ ସହ ଯୋଡ଼ାଯିବାର ଲକ୍ଷ୍ୟ ରଖାଯାଇଛି ବୋଲି ଗୁରୁବାର ନୂଆଦିଲ୍ଲୀ ଠାରେ ଏକ ଦିବସୀୟ ପ୍ରଧାନମନ୍ତ୍ରୀ ଜାତୀୟ ଆପ୍ରେଂଟିସ୍ସିପ୍ ମେଳାକୁ ଡ଼ିଜିଟାଲ ପ୍ଲାଟଫର୍ମରେ ଶୁଭାରମ୍ଭ କରିବା ଅବସରରେ କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଦେଶର ଯୁବକ ଯୁବତୀ ନିଜର କୌଶଳ ଅନୁସାରେ ଉପଯୁକ୍ତ ରୋଜଗାର ଚୟନ କରିବା ପାଇଁ ସ୍କିଲ୍ ଇଣ୍ଡିଆ ତରଫରୁ ଆୟୋଜିତ ଏହି କାର୍ଯ୍ୟକ୍ରମରେ ଶ୍ରୀ ପ୍ରଧାନ ଓଡ଼ିଶା, ମହାରାଷ୍ଟ୍ର, ପୁଣେ, ଗୁଜରାଟ ସମେତ ବିଭିନ୍ନ ଅଂଚଳର ଛାତ୍ରଛାତ୍ରୀଙ୍କ ସହ କଥା ହୋଇ ସେମାନଙ୍କର ଲକ୍ଷ୍ୟ, ମେଳାକୁ ନେଇ ଅନୁଭୂତି ଓ ଆଗାମୀ ଦିନର ଯୋଜନା ଉପରେ ପଚାରିଥିଲେ । ଭୁବନେଶ୍ୱର ସରକାରୀ ଆଇଟିଆଇରେ ବେକରୀ ବା କେକ୍ ତିଆରି କାର୍ଯ୍ୟରେ ପ୍ରଶିକ୍ଷଣ ନେଉଥିବା ଛାତ୍ରୀ କ୍ରୀଷ୍ଣା ବେନ୍ନି ରେଡ୍ଡୀ ସହ ବାର୍ତାଳାପ କରିଥିଲେ । ସେ ନିଜ ଉଦ୍ୟମରେ ଆଗାମୀ ଦିନରେ ନିଜର ବେକରୀ ଆରମ୍ଭ କରି ଏକ ଉଦ୍ୟମୀ ହେବାର ସ୍ୱପ୍ନ ଦେଖିଥିବାରୁ ତାଙ୍କୁ ପ୍ରଂଶସା କରିଥିଲେ କେନ୍ଦ୍ରମନ୍ତ୍ରୀ ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ଓଡ଼ିଶାର ୨୮ଟି ସ୍ଥାନ ସମେତ ଦେଶର ୭୦୦ରୁ ଅଧିକ ଜାଗାରେ ଆପ୍ରେଂଟିସ୍ସିପ୍ ମେଳା ଆୟୋଜନ ହୋଇଯାଇଛି । ଦେଶର ୩୦ରୁ ଅଧିକ ଶିଳ୍ପକ୍ଷେତ୍ର ସହ ଜଡିତ ୪୦୦୦ରୁ ଅଧିକ କମ୍ପାନୀ ଏହି ମେଳାରେ ଭାଗ ନେଇଛନ୍ତି । ଅଧିକରୁ ଅଧିକ ଆଶାୟୀ ଯୁବକ ଯୁବତୀମାନେ ରୋଜଗାର ପାଇଁ ପଞ୍ଜିକରଣ କରିଛନ୍ତି । ଦୂରଦୃଷ୍ଟି ସମ୍ପନ୍ନ ରାଷ୍ଟ୍ରୀୟ ଆପ୍ରେଂଟିସସିପ୍ ମେଳା ଯୁବକ ଯୁବତୀଙ୍କୁ ରୋଜଗାର ଦେବା ସହ ସେମାନଙ୍କର ଆଶା ଏବଂ ଆକାଂକ୍ଷାକୁ ପୂରଣ କରିବ । ଉଦ୍ୟମୀ ହେବା ପାଇଁ ଉଚ୍ଚାଭିଳାଷକୁ ପ୍ରୋତ୍ସାହନ ଦେବ । ଏଥିରେ ସେମାନେ ୧ ବର୍ଷ ପାଇଁ ମାସକୁ ମାସ ଷ୍ଟାଇପେଣ୍ଡ ପାଇବେ । ଯେଉଁଥିରେ ଭାରତ ସରକାରଙ୍କ ୨୫ ପ୍ରତିଶତ ଯୋଗଦାନ ରହିବ । ତେଣୁ ଜାତୀୟ ମିଶନକୁ ଆଗେଇ ନେବା ପାଇଁ ଆପ୍ରେଂଟିସ୍ସିପ୍କୁ ଜନଭାଗିଦାରୀ କରିବା ଜରୁରୀ ।
ଶ୍ରୀ ପ୍ରଧାନ ଯୋଗଦେଇଥିବା ସମସ୍ତ ସଂସ୍ଥା ଏବଂ ଷ୍ଟେକହୋଲଡରଙ୍କୁ ଏଭଳି ସୁଯୋଗକୁ ଆହୁରି ବୃଦ୍ଧି କରି ଅଧକରୁ ଅଧିକ ଆପ୍ରେଂଟିସସିପ୍ ପ୍ରଦାନ କରିବା ପାଇଁ ପ୍ରୋତ୍ସାହିତ କରିଛନ୍ତି । ସେ କହିଛନ୍ତି ଯେ ସ୍ଥାନୀୟ ଅର୍ଥନୀତିର ସୁଯୋଗ ଆଧାର କରି ଶିଳ୍ପ ସଂସ୍ଥା ସହ ଯୋଡ଼ାଗଲେ ଆଗାମୀ ଦିନରେ ଯୁବପିଢ଼ିଙ୍କୁ ଆପ୍ରେଂଟିସସିପ୍ ସୁଯୋଗ ମିଳିପାରିବ । ଆଗାମୀ ୧ ବର୍ଷ ମଧ୍ୟରେ ୧୦ ଲକ୍ଷ ଯୁବପିଢ଼ିଙ୍କୁ ଜାତୀୟ ଆପ୍ରେଂଟିସସିପ ଫ୍ରେମୱାର୍କ ସହ ବ୍ୟାଙ୍କ୍ ଆକାଉଂଟରେ ଡ଼ିଜିଟାଲ ପେମେଂଟ୍ ଅଫ୍ ଷ୍ଟାଇପେଣ୍ଡ୍ ଯୋଡ଼ିବାର ଲକ୍ଷ୍ୟ ରଖାଯାଇଛି । ଆପ୍ରେଂଟିସଙ୍କୁ ଏକାଡ଼ମିକ୍ କ୍ରେଡ଼ିଟ୍ ଭାବରେ ପ୍ରଦାନ କରାଯିବ । ଯାହା ଆଗାମୀ ଦିନରେ ପ୍ରଶିକ୍ଷଣ ନେଇଥିବା ଛାତ୍ରଛାତ୍ରୀଙ୍କୁ ସାହାଯ୍ୟ କରିବ ।
ପରବର୍ତୀ ସମୟରେ ପିଏମ ଜାତୀୟ ଆପ୍ରେଂଟିସସିପ୍ ମେଳା ପ୍ରତି ମାସରେ କରାଯିବା ଉପରେ ଗୁରୁତ୍ୱାରୋପ କରିଥିଲେ ଶ୍ରୀ ପ୍ରଧାନ । ଏହାସହ କେବଳ ଆଇଆଇଟି ପିଲାଙ୍କୁ ନୁହେଁ ବରଂ ଜନଶିକ୍ଷଣ ସଂସ୍ଥା, ଆଇଆଇଟି ଭଳି ରାଜ୍ୟରେ ଥିବା ପ୍ରଶିକ୍ଷଣ ସଂସ୍ଥା, ପ୍ରଧାନମନ୍ତ୍ରୀ କୌଶଳ କେନ୍ଦ୍ର, ଦୀନଦୟାଲ ଉପାଧ୍ୟୟ ଗ୍ରାମୀଣ କୌଶଲ୍ୟରେ ସମ୍ପୃକ୍ତ ପିଲାମାନଙ୍କୁ ଏଥିରେ ସାମିଲ କରିବା ପାଇଁ ଶ୍ରୀ ପ୍ରଧାନ ଷ୍ଟେକହୋଲଡର ଓ ଆଇଟିଆଇର କର୍ତୃପକ୍ଷଙ୍କୁ ପରାମର୍ଶ ଦେଇଥିଲେ । ସେହିପରି ଖଣିଜ ସମ୍ପଦରେ ପରିପୂର୍ଣ୍ଣ ଓଡିଶା ସମେତ ଅନ୍ୟ ରାଜ୍ୟର ବିଶେଷତାକୁ ଦୃଷ୍ଟିରେ ରଖି ଅଧିକ ଆପ୍ରେଂଟିସ ଆସିବା ଦରକାର । ଆପ୍ରେଂଟିସସିପ ପ୍ରକ୍ରିୟାକୁ ଆହୁରି ଶୃଙ୍ଖଳିତ କରିବା ସହ ଏକବିଂଶ ଶତାବ୍ଦୀରେ ଥିବା ସୁଯୋଗକୁ ଯୁବପିଢ଼ିଙ୍କ ସହ ଯୋଡ଼ିବା ପାଇଁ ଏ ଡିଜିଟାଲ ଡ୍ୟାସବୋର୍ଡ ପ୍ରତିଷ୍ଠା କରାଯିବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି ।
ଉଲ୍ଲେଖନୀୟ ଯେ, ଏହି କାର୍ଯ୍ୟକ୍ରମରେ କେନ୍ଦ୍ର ଦକ୍ଷତା ଓ ଉଦ୍ୟମିତା ରାଷ୍ଟ୍ର ମନ୍ତ୍ରୀ ରାଜୀବ ଚନ୍ଦ୍ରଶେଖର ଏବଂ ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଯୋଗଦେଇଥିଲେ ।
