-
ଅଭିଯୁକ୍ତ ଶିବକୁ ନେଇ କ୍ରାଇମ୍ ସିନ୍ ରିକ୍ରିଏସନ୍ କଲା ପୋଲିସ
କଟକ, ଜିଲ୍ଲା ମାହାଙ୍ଗା ଥାନା ଅନ୍ତର୍ଗତ କୁସୁପୁରୁରେ ଗୋଟିଏ ପରିବାରର ୫ ଜଣଙ୍କୁ ହତ୍ୟା ଘଟଣାରେ ଅଭିଯୁକ୍ତ ସାନ ଭାଇ ଶିବପ୍ରସାଦ ସାହୁକୁ ଆଜି ଘଟଣାସ୍ଥଳକୁ ନେଇ କ୍ରାଇମ୍ ସିନ୍ ରିକ୍ରିଏସନ୍ କରିଛି ପୋଲିସ । ରିମାଣ୍ଡର ଦ୍ଵିତୀୟ ଦିନରେ ଅଭିଯୁକ୍ତ ଶିବ ଘଟଣା ଦିନ କିପରି ୫ ଜଣଙ୍କୁ ହତ୍ୟା କରିଥିଲା ପୋଲିସକୁ ୪୫ ମିନିଟ୍ ଧରି ଏହାର ଡେମୋ ଦେଖାଇଛି । କ୍ରାଇମ୍ ସିନ୍ ରିକ୍ରିଏସନ୍ ପରେ ଶିବକୁ ଧରି ଫେରିଛି ପୋଲିସ । ଘଟଣାସ୍ଥଳରେ ଏଏସପି, ଏସଡ଼ିପିଓ, ମାହାଙ୍ଗା ଥାନା ଅଧିକାରୀ ଉପସ୍ଥିତ ଅଛନ୍ତି ।
ପ୍ରକାଶ ଥାଉକି, ଜମିଜମା ବିବାଦ ଓ ପାରିବାରିକ କଳହକୁ ନେଇ ଗତ ୧୨ ତାରିଖରେ ଅଭିଯୁକ୍ତ ସାନ ଭାଇ ଶିବ ବଡ ଭାଇ ଅଲେଖ ସାହୁ, ଭାଉଜ, ୧୮ ବର୍ଷିୟା ଝିଆରୀ, ଦୁଇ ନାବାଳକ ପୁତୁରାଙ୍କୁ କଟୁରୀରେ ହାଣି ହତ୍ୟା କରିଥିଲା । ହତ୍ୟାକାଣ୍ଡ ପରେ ଘରେ ତାଲା ପକାଇ ସେଠାରୁ ଫେରାର୍ ହେବା ସହ ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନାରେ ଆତ୍ମସମର୍ପଣ କରିଥିଲା । ଅଭିଯୁକ୍ତକୁ ତିନି ଦିନିଆ ରିମାଣ୍ଡରେ ନେଇଛି ପୋଲିସ । ତେବେ ଜଣେ ବ୍ୟକ୍ତି ଏକାକୀ ୫ ଜଣଙ୍କୁ ହତ୍ୟା କରିଛି ନା ହତ୍ୟାକାଣ୍ଡ ପଛରେ ଅନ୍ୟ କାହାରି ସମ୍ପୃକ୍ତି ରହିଛି ପୋଲିସ ସେନେଇ ଅଧିକ ଛାନଭିନ୍ ଜାରୀ ରଖିଛି ।
