-
ସ୍ଵାମୀ ମୃତ, ଦୁଇ ଛୁଆଙ୍କ ସହିତ ସ୍ତ୍ରୀ ଗୁରୁତର
ବୌଦ୍ଧ, ବୌଦ୍ଧ ଜିଲା ହରେକୃଷ୍ଣପୁର ଛକରେ ଏକ ମର୍ମନ୍ତୁଦ ସଡକ ଦୁର୍ଘଟଣାରେ ଘଟଣାସ୍ଥଳରେ ସ୍ଵାମୀର ମୃତ୍ୟୁ ହୋଇଥିବା ବେଳେ ଗାଡିରେ ଥିବା ଦୁଇ ଛୁଆଙ୍କ ସହିତ ସ୍ତ୍ରୀ ଗୁରୁତର ଭାବେ ଆହତ ହୋଇଛନ୍ତି ।
ସଦର ଥାନା ଅନ୍ତର୍ଗତ ୫୭ ନମ୍ବର ଜାତୀୟ ରାଜପଥର ହରେକୃଷ୍ଣପୁର ଛକ ଠାରେ ବୌଦ୍ଧ ପଟୁ ପୁରୁଣାକଟକ ଆଡକୁ ଯାଉଥିବା ସିଜି- ୦୪- ଏଚ୍ଡି – ୯୯୯୧ ନମ୍ବର ବିଶିଷ୍ଟ ଏକ କାର ଭାରସାମ୍ୟ ହରାଇ ରାସ୍ତାକଡ ଗଛ ସହିତ ଧକ୍କା ଦେଇଛି । ଛତିଶଗଡ ରାୟପୁରର ବାସିନ୍ଦା ଦିପକ ଭାଡେର ନିଜେ ଗାଡି ଚଳାଇ ପତ୍ନୀ ସୀମା ଭାଡେର ଓ ୨ ଛୋଟ ଝିଅ ପାଲକ ଓ ଖୁସିଙ୍କୁ ଧରି ପୁରୀ ଅଭିମୁଖେ ଯାତ୍ରା କରୁଥିବା ବେଳେ ଦୁର୍ଘଟଣା ଘଟିଛି । କାର୍ ଟି ଭାରସାମ୍ୟ ହରାଇ ଗଛରେ ଧକ୍କା ଦେବା ଫଳରେ ଗାଡି ଚାଳକ ଦୀପକଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି । ଦୁର୍ଘଟଣାରେ ଗାଡିରେ ବସିଥିବା ମହିଳା ସୀମା ଓ ୨ ଛୋଟ ଝିଅ ପାଲକ ଓ ଖୁସି ଗୁରୁତର ଆହତ ହୋଇଛନ୍ତି । ଆହତମାନଙ୍କୁ ସ୍ଥାନିୟ ଲୋକେ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ପୁରୁଣାକଟକ ଡାକ୍ତରଖାନାକୁ ପଠାଇଥିଲେ । ମହିଳାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ରହିଥିବା ବେଳେ ୨ ଛୋଟ ଝିଅ ପାଲକ ଓ ଖୁସି ବିପଦ ମୁକ୍ତ ଥିବା ଜଣାପଡିଛି । ବୌଦ୍ଧ ପୋଲିସ ଘଟଣାସ୍ଥଳରେ ପହଁଚି ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ବୌଦ୍ଧ ମୁଖ୍ୟ ଚିକିତ୍ସାଳୟକୁ ପଠାଇଛି । ପୋଲିସ ଘଟଣାର ତଦନ୍ତ କରୁଛି ।
