-
ଢେଙ୍କାନାଳ ପୈାରଧ୍ୟକ୍ଷାଙ୍କ ଉପରେ ଆକ୍ରମଣ ପ୍ରସଙ୍ଗ
ଭୁବନେଶ୍ୱର, ନିର୍ବାଚିତ ଜନପ୍ରତିନିଧି ତଥା ଢେଙ୍କାନାଳ ପୈାରଧ୍ୟକ୍ଷା ଶ୍ରୀମତୀ ପାତ୍ରଙ୍କ ଉପରକୁ ଆକ୍ରମଣ କରାଯିବା ଅତ୍ୟନ୍ତ ନିନ୍ଦନୀୟ ଓ ଲଜ୍ଜଦାୟକ । ଗୋଟିଏ ପଟେ ରାଜ୍ୟ ସରକାର ନାରୀ ସଶକ୍ତିକରଣର ବାହାସ୍ପୋଟ ମାରୁଥିବାବେଳେ ଅନ୍ୟ ପଟେ ରାଜନୈତିକ ଆକ୍ରୋଶ ରଖି ମହିଳାମାନଙ୍କୁ ଆକ୍ରମଣ କରିବା ଶାସକ ବିଜେଡିର ଦୋମୁହାଁ ଚରିତ୍ରକୁ ପର୍ଦ୍ଦାଫାଶ କରିଛି ବୋଲି ବିଧାୟକ ତଥା ରାଜ୍ୟ ଉପସଭାପତି ଲଲିତେନ୍ଦୁ ବିଦ୍ୟାଧର ମହାପାତ୍ର କହିଛନ୍ତି ।
ଗତ କାଲି ଢେଙ୍କାନାଳ ଗସ୍ତ କରି ବାସ୍ତବସ୍ଥିତି ଅନୁଧ୍ୟାନ କରିଥିବା ପ୍ରତିନିଧି ଦଳର ସଦସ୍ୟ ତଥା ବିଧାୟକ ଶ୍ରୀ ମହାପାତ୍ର ଆଜି ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଓଡିଶାର ମହିଳାମାନେ କେତେ ସୁରକ୍ଷିତ, ତାହା ଶ୍ରୀମତୀ ପାତ୍ରଙ୍କ ଉପରେ ବାରମ୍ବାର ଆକ୍ରମଣରୁ ସ୍ପଷ୍ଟ ହୋଇଛି । ବରିଷ୍ଠ ପୋଲିସ ଅଧିକାରୀମାନେ ବିଜେଡି ରାଜ୍ୟ ସଭାପତିଙ୍କୁ ଭେଟି ନିର୍ବାଚନ ବିଜୟ ଶୁଭେଚ୍ଛା ଓ ଅଭିନନ୍ଦନ ଜଣାଇବା ଘଟଣା ନିଶ୍ଚିତ ଭାବେ ଶାସକ ବିଜେଡିର ଗୁଣ୍ଡାମାନଙ୍କୁ ନିର୍ଭୟରେ ଏଭଳି ହୀନ କାର୍ଯ୍ୟ କରିବାକୁ ପ୍ରୋତ୍ସାହିତ କରିଛି । ବିଜେପି କାର୍ଯ୍ୟକର୍ତାଙ୍କୁ ଧମକ ଦେଇ ଭୟଭୀତ କରିବା, ମିଛ ପୋଲିସ କେସ୍ରେ ଫସାଇବା, ମରଣାନ୍ତକ ଆକ୍ରମଣ କରିବା ଆଦି ଘଟଣା ଶାସକ ବିଜେଡିର ଅସହିଷ୍ଣୁତାର ପରିଚୟ ଦେଇଛି ଏବଂ ଏହା ସୁସ୍ଥ ଗଣତନ୍ତ୍ର ପ୍ରତି ସଂପୂର୍ଣ୍ଣ ବିପଦ ବୋଲି ଶ୍ରୀ ମହାପାତ୍ର କହିଛନ୍ତି ।
ବୋମାମାଡ କରି କଣ ବାର୍ତା ଦେବାକୁ ଚାହୁଁଛି ଶାସକ ବିଜେଡି ? ଯଦି ଓଡିଶାରେ ମହିଳା ସୁରକ୍ଷିତ ଓ ମହିଳା ସଶକ୍ତିକରଣ ସଠିକ ହୋଇଛି, ତାହେଲେ ଶ୍ରୀମତୀ ପାତ୍ରକୁ ସୁରକ୍ଷା କାହିଁକି ଦେଇପାରୁନାହିଁ ଜିଲ୍ଲା ପ୍ରଶାସନ ? କେବଳ ଢେଙ୍କାନାଳ ପୈାରଧ୍ୟକ୍ଷା ନୁହନ୍ତି, ବରଂ କାଉନସିଲର ଭାବେ ନିର୍ବାଚିତ ହୋଇଥିବା ମହିଳା ଏବଂ ତାଙ୍କ ପରିବାରକୁ ମଧ୍ୟ ଭୟଭୀତ କରାଯାଉଛି । ଜନପ୍ରତିନିଧି ଭାବେ ନିର୍ବାଚିତ ହୋଇଥିବା ଶ୍ରୀମତୀଙ୍କ ଉପରେ ଆକ୍ରମଣ କରିଥିବା ସମସ୍ତ ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ତାଙ୍କୁ ସଂପୂର୍ଣ୍ଣ ସୁରକ୍ଷା ଯୋଗାଇ ଦେବାକୁ ପ୍ରତିନିଧି ଦଳର ଅନ୍ୟତମ ସଦସ୍ୟା ତଥା ରାଜ୍ୟ ଉପସଭାନେତ୍ରୀ ଶ୍ରୀମତୀ ପ୍ରଭାତୀ ପରିଡା କହିଛନ୍ତି ।
ଆଜିର ସାମ୍ବାଦିକ ସମ୍ମିଳନୀରେ ପ୍ରତିନିଧି ଦଳର ଅନ୍ୟତମ ସଦସ୍ୟା ତଥା ରାଜ୍ୟ ଉପସଭାନେତ୍ରୀ ଶ୍ରୀମତୀ ଅନୀତା ଶୁଭଦର୍ଶିନୀ ଏବଂ ରାଜ୍ୟ ଗଣାମାଧ୍ୟମ ମୁଖ୍ୟ ଦିଲୀପ ମଲ୍ଲିକ୍ ପ୍ରମୁଖ ଉପସ୍ଥିତ ଥିଲେ ।
