ଭଦ୍ରକ, ଧାମନଗର ଏନଏସିର ୬ଟି ବୁଥ୍ ରେ ଆଜି ପୁନଃ ମତଦାନ ଶାନ୍ତି ଶୃଙ୍ଖଳାର ସହିତ ଶେଷ ହୋଇଛି । ସକାଳ ୧୦ଟା ଠାରୁ ଅପରାହ୍ନ ୪ଟା ପର୍ଯ୍ୟନ୍ତ ଏହି ଭୋଟ ଗ୍ରହଣ ଅନୁଷ୍ଠିତ ହୋଇଥିଲା । ପ୍ରବଳ ଖରା ସତ୍ୱେ ଲୋକମାନେ ଲମ୍ବା ଧାଡିରେ ଘଂଟା ଘଂଟା ଧରି ପ୍ରତୀକ୍ଷା କରି ମତଦାନ କରିଥିବା ଦେଖାଯାଇଥିଲା । ଶାନ୍ତିଶୃଙ୍ଖଳାର ସହିତ ଭୋଟ୍ ଗ୍ରହଣ ପାଇଁ ଭଦ୍ରକ ଜିଲ୍ଲା ପୋଲିସ ପକ୍ଷରୁ ୧୧ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ଭଦ୍ରକ ଏସପି ଚରଣ ସିଂ ମିନାଙ୍କ ନେତୃତ୍ୱରେ ବିଭିନ୍ନ ଅଂଚଳରେ ଫ୍ଲାଗମାର୍ଚ୍ଚ କରାଯାଇଛି ।
ଏଠାରେ ଉଲ୍ଲେଖଯୋଗ୍ୟ ଯେ, ଏଠାରେ ପୂର୍ବରୁ ଭୋଟ୍ ଗ୍ରହଣ ବେଳେ ହିଂସା ଯୋଗୁଁ ନିର୍ବାଚନ ବନ୍ଦ ହୋଇଥିଲା । ମାର୍ଚ୍ଚ ୨୪ ତାରିଖରେ ୧୧ଟି ୱାର୍ଡ଼ର ୨୦ଟି ବୁଥ୍ ରେ ନିର୍ବାଚନ ଅନୁଷ୍ଠିତ ହୋଇଥିଲା । ତେବେ ୯ନଂ ୱାର୍ଡ଼ର ୧୬ ନଂ ବୁଥରେ ଅପ୍ରିତିକର ପରିସ୍ଥିତି ସୃଷ୍ଟି ହୋଇଥିଲା । ସେଥିପାଇଁ ଯେଉଁ ଅନ୍ୟ ୬ଟି ବୁଥ୍ ରେ ମଧ୍ୟ ଭଙ୍ଗାରୁଜା ହୋଇଥିଲା ସେଠାରେ ମଧ୍ୟ ଭୋଟ୍ ବାତିଲ୍ ହୋଇଥିଲା । ପରେ ନିର୍ବାଚନ ଅଧିକାରୀଙ୍କ ନିର୍ଦ୍ଦେଶ କ୍ରମେ ଆଜି ଧାମନଗର ଏନଏସିର ୨ନଂ ୱାର୍ଡ଼ର ବୁଥ୍ ନଂ ୩, ୫ ନଂ ୱାର୍ଡ଼ର ବୁଥ ନଂ ୮ ଓ ୯, ୯ ନଂ ୱାର୍ଡ଼ର ବୁଥ୍ ନଂ ୧୬, ୧୦ ନଂ ୱାର୍ଡ଼ ବୁଥ୍ ନଂ ୧୭ ଓ ୧୮ ରେ ସାନି ମତଦାନ ଅନୁଷ୍ଠିତ ହୋଇଛି ।
