ଗଞ୍ଜାମ, ଗଞ୍ଜାମ ଜିଲ୍ଲା ପାଟପୁର ଥାନା ଅଧିନସ୍ଥ ଟି. ଗୋବିନ୍ଦପୁର ପଚାଂୟତର ଦୁର୍ଗମ ଅଂଚଳ ବଡାଗଡ଼ର ଏକ ଘର ଉପରେ ପୋଲିସ ପକ୍ଷରୁ ଅତର୍କିତ ଚଢ଼ଉ କରାଯାଇ ବିପୁଳ ପରିମାଣର ଗଞ୍ଜେଇ ଜବତ କରାଯାଇଛି । ଏଥିରେ ଉକ୍ତ ଗ୍ରାମର ମାର୍ଥା ଶବରକୁ ଗିରଫ କରାଯିବା ସହ ତା ଘରୁ ୪୧୨ କେଜି ୫୦୦ ଗ୍ରାମ୍ ଗଞ୍ଜେଇ ଜବତ କରାଯାଇଛି । ଯାହାର ମୂଲ୍ୟ ପାଖାପାଖି ୬୦ ଲକ୍ଷ ଟଙ୍କାରୁ ଅଧିକ ହେବ ବୋଲି ଆସିକା ଏସଡିପିଓ ଉମାଶଙ୍କର ସିଂହ ସୂଚନା ଦେଇଛନ୍ତି । ତପ୍ତପାଣି ଘାଟିର ଉପାନ୍ତ ଇଲାକା ଭାବେ ପରିଚିତ ଆଦିବାସୀ ଅଧ୍ୟୁଷିତ ବଡାଗଡ଼ରେ ଥିବା ଉକ୍ତ ଘରେ ଗଞ୍ଜେଇ ଗଚ୍ଛିତ ରଖାଯାଇଥିବା ସୂଚନା ମିଳିବା ପରେ ପାଟପୁର ଥାନା ଅଧିକାରୀ ସବ୍ୟସାଚୀ ମଲ୍ଲ ସଙ୍ଗେ ସଙ୍ଗେ ଏସଆଇ ଟୁନା ପିଡିକା ଓ ଟିମ୍ ସହ ସେଠାରେ ଚଢ଼ଉ କରିଥିଲେ । ସାନଖେମୁଣ୍ଡି ତହସିଲଦାର ଡଃ. ଶ୍ରୀନିବାସ ବେହେରାଙ୍କ ଉପସ୍ଥିତିରେ ଏହାର ଓଜନ କରାଯାଇଥିଲା । ଅଭିଯୁକ୍ତ ମାର୍ଥାକୁ ଗିରଫ କରାଯିବା ସହ ଏନେଇ ଅଧିକ ତଦନ୍ତ ଜାରୀ ରହିଥିବା ଏସଡ଼ିପିଓ ଶ୍ରୀ ସିଂହ କହିଛନ୍ତି ।
