ସାଲେପୁର, ବଡକ୍ଷୀର ପଞ୍ଚାୟତ ଗୋପପୁର ମୌଜାର ପ୍ଲଟ ନଂ ୧୪୫୧ ଓ ଖାତା ନଂ ୬୬୧ ରେ ହୋଇଥିବା ଏକ ଘରେ ଠିପି ବନ୍ଦ ବିଦେଶୀ ମଦଦୋକାନ ଖୋଲିବା ପାଇଁ ଜନସାଧାରଣଙ୍କ ଠାରୁ ଅଭିଯୋଗ ପତ୍ର ପ୍ରାପ୍ତି ନିମନ୍ତେ ଜିଲ୍ଲାପାଳ ସରପଞ୍ଚଙ୍କ ମାଧ୍ୟମରେ ଏକ ବିଜ୍ଞପ୍ତି ଜାରୀ କରିଛନ୍ତି । ନବ ନିର୍ବାଚିତ ସରପଞ୍ଚ ହିଂମାଶୁ ନାରାୟଣ ମଲ୍ଲ ଏହି ବିଜ୍ଞପ୍ତି ପାଇବା ପରେ ଜନସାଧାରଣଙ୍କୁ ନିୟମାନୁଯାୟୀ ଜଣାଇବାରୁ ପଞ୍ଚାୟତବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।
ଏଠାରେ ସୂଚନା ଥାଉ କି, ଯେଉଁ ସ୍ଥାନରେ ନୂତନ ଭାବେ ମଦ ଦୋକାନ ଖୋଲାଯିବା ପାଇଁ ସରକାରଙ୍କ ପକ୍ଷରୁ ସ୍ଥିର କରାଯାଇଛି ସେ ସ୍ଥାନ ପାଖାପାଖି ଘରୋଇ ବିବାହ ମଣ୍ଡପ, ଏକ ଘରୋଇ ଇଂରାଜୀ ମାଧ୍ୟମ ବିଦ୍ୟାଳୟ ସମେତ ଏକ ସରସ୍ଵତୀ ଶିଶୁ ବିଦ୍ୟାମନ୍ଦିର ଅବସ୍ଥିତ ଏବଂ ସେଠାରେ ବହୁ ଜନସାଧାରଣ ବାସଗୃହ ନିର୍ମାଣ କରି ବସବାସ କରୁଛନ୍ତି । ଏହାର ଅଳ୍ପ କିଛି ଦୂରତାରେ ପଞ୍ଚାୟତ ପ୍ରହଲ୍ଳାଦ ମହାବିଦ୍ୟାଳୟ ଅବସ୍ଥିତ । ସରକାରଙ୍କ ନିୟମାନୁଯାୟୀ, ରାଜ୍ୟ ରାଜପଥର ୫୦୦ ମିଟର ଦୂରରେ ମଦ ଦୋକାନ ଖୋଲିବା କଥା, ମାତ୍ର ଏଠାରେ ରାଜ୍ୟ ରାଜପଥ କଟକ – ଚାନ୍ଦବାଲି ରାସ୍ତା କଡରେ ମଦ ଦୋକାନ ଖୋଲିବାକୁ ସରକାରୀ ସ୍ଵୀକୃତି ମିଳିଛି । କଟକ ଜିଲ୍ଳା ଅବକାରୀ କାର୍ଯ୍ୟାଳୟ ପକ୍ଷରୁ ଏଠାରେ ମଦ ଦୋକାନ ଖୋଲିବା ପାଇଁ ଯେଉଁ ବିଜ୍ଞପ୍ତି କରାଯାଇଛି ତାହା ପୁୁରୁଷୋତ୍ତମପୁର ସ୍ଥାନର ଲାଇସେନ୍ସ ବୋଲି ଏହି ବିଜ୍ଞପ୍ତିରେ ଦର୍ଶାଯାଇଛି । ଏଠାରେ ପ୍ରଶ୍ନ ଉଠୁଛି, ଯଦି ପୁରୁଷୋତ୍ତମପୁରର ଜନସାଧାରଣ ସେ ସ୍ଥାନରେ ମଦ ଦୋକାନ ଖୋଲିବା ପାଇଁ ବିରୋଧ କଲେ ତାହାହେଲେ କ’ଣ ପାଇଁ ଗୋପପୁର ମୌଜାରେ ଏହାକୁ ଖୋଲାଯିବ ସେ ନେଇ ସାଧାରଣରେ ପ୍ରଶ୍ନ ଉଠୁଛି । ଗତ ପଞ୍ଚାୟତ ନିର୍ବାଚନ ପୂର୍ବରୁ ଏହି ମଦଦୋକାନଟି ଜିଗ୍ନିପୁର ପଞ୍ଚାୟତର ବାହାବଳପୁର ଛକଠାରେ ଖୋଲିବା ପାଇଁ ନିଷ୍ପତି କରାଯାଇ ବିଜ୍ଞପ୍ତି ମଧ୍ୟ ଜାରୀ ହୋଇଥିଲା । ସେହି ପଞ୍ଚାୟତର ଅଧିବାସୀମାନେ ଏହି ଦୋକାନ ଖୋଲିବା ପାଇଁ ତୀବ୍ର ବିରୋଧ କରିବାରୁ ତାହାକୁ କିଛି ଦିନ ବନ୍ଦ କରାଯାଇ ଏବେ ପୁନର୍ବାର ସେହି ଦୋକାନଟିକୁ ଗୋପପୁର ମୌଜାର କଟକ – ଚାନ୍ଦବାଲି ରାସ୍ତା କଡରେ ଖୋଲିବା ପାଇଁ ଏହି ବିଜ୍ଞପ୍ତି ଜାରୀ କରାଯାଇଛି । ଏହି ପରୀପ୍ରେକ୍ଷୀରେ ବଡକ୍ଷୀର ପଞ୍ଚାୟତର ସରପଞ୍ଚ ତା. ୪.୪.୨୦୨୨ ରିଖରେ ପଞ୍ଚାୟତର ସମସ୍ତ ୱାର୍ଡ ସଭ୍ୟସଭ୍ୟାଙ୍କୁ ନେଇ ଏକ ଜରୁରୀ ବୈଠକ ବସାଇଥିଲେ । ଏହି ବୈଠକରେ ଉପସ୍ଥିତ ସମସ୍ତ ୱାର୍ଡ ସଭ୍ୟସଭ୍ୟାମାନେ ଉକ୍ତ ସ୍ଥାନରେ ମଦ ଦୋକାନ ଖୋଲିବାକୁ ନେଇ ବାରଣ କରିବାରେ ସହମତି ପ୍ରକାଶ କରିଥିଲେ । ଏହି ବିଜ୍ଞପ୍ତି ଜନସାଧାରଣ ଜାଣିବା ପରେ ଯଦି ସରକାର ଏଠାରେ ମଦ ଦୋକାନ ଖୋଲନ୍ତି ତାହାହେଲେ ବଡକ୍ଷୀର ପଞ୍ଚାୟତବାସୀ ରାଜରାସ୍ତାକୁ ଓହ୍ଲାଇ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ପ୍ରକାଶ କରିଛନ୍ତି ।
ଅପରପକ୍ଷରେ ସରପଞ୍ଚ ଜନସାଧାରଣଙ୍କ ଅଭିଯୋଗରେ ଏଠାରେ ମଦ ଦୋକାନ ଖୋଲିବା ପାଇଁ ବିରୋଧ କରାଯାଇଥିବା ସଂକ୍ରାନ୍ତରେ ଜିଲ୍ଲାପାଳଙ୍କୁ ଅବଗତ କରାଇଛନ୍ତି ବୋଲି ପ୍ରକାଶ କରିଛନ୍ତି ।
