ଧର୍ମଶାଳା, ଚଣ୍ଡିଖୋଲ-ପାରାଦୀପ ୫ ନଂ (କ) ଜାତୀୟ ରାଜପଥର ବେଣାପୁର ନିକଟରେ ଆଜି ମଧ୍ୟାହ୍ନରେ ଘଟିଯାଇଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା । ଟ୍ରକ୍ ଧକ୍କାରେ ଜଣେ ବାଇକ୍ ଆରୋହୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ବାଇକ୍ ରେ ଥିବା ଅନ୍ୟ ଦୁଇ ଜଣ ଯୁବକ ଗୁରୁତର ଭାବେ ଆହତ ହୋଇଛନ୍ତି । ସେମାନଙ୍କୁ ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ପ୍ରଥମେ ବଡ଼ଚଣା ଗୋଷ୍ଠି ସ୍ଵାସ୍ଥ୍ୟକେନ୍ଦ୍ର ଓ ପରେ ଅବସ୍ଥା ସଙ୍କଟାପନ୍ନ ହେବାରୁ ଉଭୟଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଖବର ପାଇ ଚଣ୍ଡିଖୋଲ ଫାଣ୍ଡି ଅଧିକାରୀ ଚିତରଞ୍ଜନ ଜେନା ସଦଳବଳେ ଘଟଣାସ୍ଥଳରେ ପହଂଚି ଦୁର୍ଘଟଣାଗସ୍ତ ଟ୍ରକ୍ ଓ ବାଇକ୍ କୁ ଜବତ କରିବା ସହ ଘଟଣାର ତଦନ୍ତ ଚଳାଇଛନ୍ତି । ମୃତକଙ୍କ ନାମ ନୃସିଂହ ପ୍ରଧାନ ବୋଲି ଜଣାପଡିଥିବା ବେଳେ ଗୁରୁତର ଦ୍ଵୟ ହେଲେ ବିକି ପ୍ରଧାନ ଓ ଇନ୍ଦ୍ରଜିତ ପ୍ରଧାନ ବୋଲି ସୂଚନା ମିଳିଛି । ପୋଲିସର ପ୍ରାଥମିକ ତଦନ୍ତରୁ ସେମାନଙ୍କ ଘର ଯାଜପୁର ଜିଲ୍ଲା କଳିଙ୍ଗନଗର ରାବଣା ଅଂଚଳର ବୋଲି ଜଣାପଡିଛି ।
