ବୌଦ୍ଧ, ଡିନାମାଇଟ ବିସ୍ଫୋରଣ ନେଇଛି ଯୁବକଙ୍କ ଜୀବନ । ଗତକାଲି କୂଅ ଖନନରେ ଡିନାମାଇଟ ବମ୍ ଦ୍ଵାରା ପଥର ବ୍ଲାଷ୍ଟିଂ ବେଳେ ଜଣେ ଯୁବକଙ୍କ ମୃତ୍ୟୁ ହୋଇଛି । ବୌଦ୍ଧ ଜିଲ୍ଲା ପୁରୁଣାକଟକ ଥାନା ରତନପୁର ଗ୍ରାମରେ କୂଅ ଖନନରେ ପଥର ବ୍ଲାଷ୍ଟିଂ ବେଳେ ଯୁବକଙ୍କ ମୃତ୍ୟୁ ଘଟିଛି । ମୃତକ ହେଲେ ହରଭଙ୍ଗା ଥାନା ଖରଭୁଇଁ ଗ୍ରାମର ସୁରେନ୍ଦ୍ର ବଗର୍ତି ।
ସୂଚନା ଅନୁଯାୟୀ, ରତନପୁର ଗ୍ରାମର ବିଶିକେଶନ ପ୍ରଧାନ ନିଜ ଘରେ କୂଅ ଖୋଳିବା ପାଇଁ ଚାରିଛକର ସୁମନ୍ତ ସାହୁଙ୍କୁ ଠିକା ଦେଇଥିଲେ । ସୁମନ୍ତ କିଛି ଶ୍ରମିକ ଓ ବ୍ଲାଷ୍ଟିଂ ରେ ବ୍ୟବହୃତ ସାମଗ୍ରୀ ସହ କୂଅ ଖୋଳୁଥିଲେ । ଗତକାଲି ସନ୍ଧ୍ୟା ସମୟରେ ଏକ ବିସ୍ଫୋରକ ସାମଗ୍ରୀ କୂଅରେ ପକାଇ ଥିଲେ । ମାତ୍ର ଉକ୍ତ ବମ୍ ଟି ନଫୁଟିବାରୁ କାରଣ ଜାଣିବାକୁ ସୁରେନ୍ଦ୍ର ବଗର୍ତିଙ୍କୁ କୂଅ ଭିତରକୁ ପଠାଯାଇଥିଲା । ସୁରେନ୍ଦ୍ର କୂଅ ଭିତରକୁ ପଶିଲା ପରେ ବମ ବିସ୍ଫୋରଣ ହୋଇଥିଲା । ଫଳରେ କୂଅ ଭିତରେ ହିଁ ସୁରେନ୍ଦ୍ରଙ୍କ ମୃତ୍ୟୁ ହୋଇଥିଲା । ସୁରେନ୍ଦ୍ରଙ୍କ ମୃତ୍ୟୁ ପରେ ଘଟଣାସ୍ଥଳରେ ବିସ୍ଫୋରଣରେ ବ୍ୟବହୃତ ସାମଗ୍ରୀ ଛାଡି ଠିକାଦାର ସୁମନ୍ତ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । ଖବର ପାଇ ମୃତକଙ୍କ ପରିବାର ଲୋକେ ଓ ଘର ମାଲିକ ବିଶିକେଶନ ପ୍ରଧାନ ପୁରୁଣାକଟକ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଥିବା ଜଣାପଡ଼ିଛି । ଅନ୍ୟପଟେ ଘର ମାଲିକ ସୁମନ୍ତଙ୍କୁ କୂଅ ଖୋଳିବା ପାଇଁ ଠିକା ଦେଇଥିବା ସ୍ପଷ୍ଟ କରିଛନ୍ତି ।
