ଗଞ୍ଜାମ, ଗଞ୍ଜାମ ଜିଲ୍ଲା ରମ୍ଭା ଥାନା ଅନ୍ତର୍ଗତ ସାନ ରାମଚନ୍ଦ୍ରପୁର ପଚାଂୟତର କାଠଛାଲିଆ ଗ୍ରାମର ଜଣେ ଯୁକ୍ତ ଦୁଇ ଛାତ୍ରୀଙ୍କୁ ଅପହରଣ କରାଯାଇଥିବା ନେଇ ସମ୍ପୃକ୍ତ ଛାତ୍ରୀଙ୍କ ପରିବାର ପକ୍ଷରୁ ଥାନାରେ ଏତଲା ହୋଇଛି । ଗତ ୧୨ ତାରିଖରେ ଛାତ୍ରୀଙ୍କ ମା ଓ ବାପା ନଣନ୍ଦ ଘରକୁ ଯାଇଥିଲେ । ଫେରିଲା ବେଳେକୁ ଘରେ ତାଙ୍କ ଝିଅ ନଥିବା ଜାଣିବାକୁ ପାଇଥିଲେ । ସମ୍ପର୍କୀୟ ଓ ବନ୍ଧୁବାନ୍ଧବଙ୍କ ଘର ଖୋଜାଖୋଜି କରିବା ପରେ ଛାତ୍ରୀଙ୍କ କୌଣସି ସନ୍ଧାନ ମିଳିନଥିଲା । ସେହି ଗ୍ରାମର ଜଣେ ପିଲା ଠାରୁ ଏହି ଦମ୍ପତି ସୂଚନା ପାଇଥିଲେ ଯେ, ଦୁଇ ଜଣ ଯୁବକ ତାଙ୍କ ଝିଅକୁ ବାଇକ୍ ରେ ବସାଇ ନେଇଯାଇଛନ୍ତି । ସେ ଏହା ତାଙ୍କ ଏତଲାରେ ଉଲ୍ଲେଖ କରିଛନ୍ତି । ରମ୍ଭା ଥାନା ପୋଲିସ ଏ ସଂକ୍ରାନ୍ତରେ ୬୫/୨୨ ରେ ଏକ ମାମଲା ରୁଜ୍ଜୁ କରି ଘଟଣାର ତଦନ୍ତ ଚଳାଇଥିବା ନେଇ ଏସଆଇ ଦେବଦତ ପ୍ରିୟଦର୍ଶିନୀ ସୂଚନା ଦେଇଛନ୍ତି ।
