ଗଞ୍ଜାମ- ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ଧନଞ୍ଜୟପୁର ଶାସନରେ ଆଜି ଅବକାରୀ ଗୁଇନ୍ଦା ବିଭାଗ ପକ୍ଷରୁ ଚଢ଼ଉ କରାଯାଇ ୩ କ୍ୱିଂଟାଲ ଗଞ୍ଜେଇ ଜବତ ହୋଇଛି । ସେହିପରି ବସଷ୍ଟାଣ୍ଡରୁ ମଧ୍ୟ ୧୫ କେଜି ଗଞ୍ଜେଇ ଜବତ ହୋଇଛି । ଉଭୟ ଘଟଣାରେ ଦୁଇ ଜଣଙ୍କୁ ଗିରଫ କରାଯାଇଛି।
୧୫ ବଖରା ଘର ଜଳିଗଲା, ୪ ପରିବାର ସର୍ବସ୍ୱାନ୍ତ
ଭଦ୍ରକ – ଭଦ୍ରକ ଜିଲ୍ଲା ବନ୍ତ ବ୍ଲକ ଅନ୍ତର୍ଗତ ଟିଲୋ ପଚାଂୟତ ତିରିଣିଆ ଗ୍ରାମରେ ଗତକାଲି ବିଳମ୍ବିତ ରାତିରେ ଅଗ୍ନିକାଣ୍ଡ ଘଟି ୪ଟି ପରିବାରର ୧୫ ବଖରା ଘର ପୋଡି ପାଉଁଶ ହୋଇଯାଇଛି । ଅଗ୍ନିକାଣ୍ଡରେ ଘରେ ଥିବା ଲକ୍ଷାଧିକ ଟଙ୍କା ମୂଲ୍ୟର ଆସବାବପତ୍ର ଜଳିପୋଡ଼ି ଛାରଖାର୍ ହୋଇଯାଇଛି । ତେବେ ନିଆଁ ଲାଗିବାର କାରଣ ଅଦ୍ୟାବଧି ଅସ୍ପଷ୍ଟ ରହିଛି।
ପାୱାର ଚାନେଲରେ ଭାସିଯାଇ ନାବାଳକ ନିଖୋଜ
ସମ୍ବଲପୁର- ବୁର୍ଲା ପାୱାର ଚାନେଲରେ ଭାସିଯାଇ ଜଣେ ନାବାଳକ ନିଖୋଜ ଅଛନ୍ତି । ମାଆ ସହ ଗାଧୋଇବା ବେଳେ ଭାସିଯାଇଛନ୍ତି ଏହି ୮ ବର୍ଷର ନାବାଳକ । ଆଜି ପୂର୍ବାହ୍ନରେ ପାୱାର ଚାନେଲର ଶିବ ମନ୍ଦିର ନିକଟରେ ଘଟିଛି ଏଭଳି ଏକ ଅଘଟଣ । ନିଖୋଜ ନାବାଳକ ଜଣକ ୱାନ-ଆର୍ କଲୋନୀର ରୋନକ ପଚଂ ବିହାର ବୋଲି ଜଣାପଡିଛି । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ସ୍ଥାନୀୟ ଲୋକଙ୍କ ସହାୟତାରେ ଖୋଜାଖୋଜି ଜାରୀ ରଖିଛି ।
