ନୂଆପଡ଼ା, ନୂଆପଡ଼ା ଜିଲ୍ଲା ବୋଡେ଼ନ ବ୍ଲକ ଅନ୍ତର୍ଗତ ରୋକାଲ ଖେଳ ପଡ଼ିଆରେ ନେହେରୁ ଯୁବକେନ୍ଦ୍ର ନୂଆପଡ଼ାର ସହଯୋଗ ଓ ଜୟ ଜଗନ୍ନାଥ ଯୁବକ ସଂଘ ରୋକାଲ ଆୟୋଜନରେ ବ୍ଲକସ୍ତରୀୟ ଯୁବ କ୍ରୀଡ଼ା ପ୍ରତିଯୋଗିତାର ଶୁଭାରମ୍ଭ ହୋଇଯାଇଛି । ଉକ୍ତ ଯୁବ କ୍ରୀଡ଼ା ପ୍ରତିଯୋଗିତାରେ ଭଲିବଲ, କବାଡି, ୧୦୦ ମିଟର ଦୌଡ଼ ପ୍ରତିଯୋଗିତା, ଲମ୍ବା ଡିଆଁ, ଉଚ୍ଚ ଡିଆଁ, ଧୀର ସାଇକେଲ ଇତ୍ୟାଦି ଖେଳ ପ୍ରତିଯୋଗିତା ଅନୁଷ୍ଠିତ ହୋଇଥିବା ବେଳେ ବୋଡେ଼ନ ବ୍ଲକର ୧୫ ଟି ଗ୍ରାମ ପଞ୍ଚାୟତର ବହୁ ସଂଖ୍ୟକ ଯୁବ କ୍ରୀଡ଼ା ପ୍ରତିଯୋଗୀ ମାନେ ଏଥିରେ ଯୋଗଦେଇ ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ ।
ଏହି ପ୍ରତିଯୋଗିତାରେ ମୁଖ୍ୟ ଅତିଥି ଭାବରେ ବିଜେଡ଼ି ଜିଲ୍ଲା ସାଧାରଣ ସମ୍ପାଦକ ଦିନେଶ ପ୍ରସାଦ ତିୱାରୀ, ମୁଖ୍ୟବକ୍ତା ଭାବେ ସାମ୍ବାଦିକ ବିସିକେଶନ ପଣ୍ଡା ଉପସ୍ଥିତ ଥିବାବେଳେ ସମ୍ମାନିତ ଅତିଥି ରୂପେ ଜିଲ୍ଲା ବିଜେଡି ସମ୍ପାଦକ ଲମ୍ବୋଦର ନିଆଲ, ପୂର୍ବତନ ରୋକାଲ ସରପଞ୍ଚ ବିଶିକେସନ ବିଶ୍ୱାଳ ଯୋଗଦାନ କରିଥିଲେ । ଅନୁଷ୍ଠିତ କ୍ରୀଡ଼ା ପ୍ରତିଯୋଗିତାରେ ନେହେରୁ ଯୁବକେନ୍ଦ୍ରରୁ ଅଞ୍ଜଳି ଶବର ଓ ଜୟ ଜଗନ୍ନାଥ ଯୁବକ ସଂଘର ସଭାପତି ଈଶ୍ୱର ମାଝୀଙ୍କ ସମେତ ଜୟ ଜଗନ୍ନାଥ ଯୁବକ ସଂଘର ସମସ୍ତ କର୍ମକର୍ତା ଉପସ୍ଥିତ ରହି ପୂର୍ଣ୍ଣ ସହଯୋଗ କରିଥିଲେ ।
