ବାରିପଦା – ମୟୂରଭଞ୍ଜ ଜିଲ୍ଲା ମହୁଲଡ଼ିହା ଥାନା ଅନ୍ତର୍ଗତ ଗୋଡ଼ଭଙ୍ଗା ଘାଟିରେ ଦିନକୁ ଦିନ ଦୁର୍ଘଟଣା ବୃଦ୍ଧିପାଇବାରେ ଲାଗିଛି । ଗାଡ଼ି ଚାଳକମାନଙ୍କ ମଧ୍ୟରେ ସତର୍କତାର ଅଭାବ କାରଣରୁ ଏହା ଡେଥ ଜୋନରେ ପରିଣତ ହୋଇଛି ଏବଂ ବିଭିନ୍ନ ସମୟରେ ଧନଜୀବନ ହାନୀର କାରଣ ପାଲଟିଯାଇଛି ।
ସୂଚନା ଅନୁଯାୟୀ, ଆଜି ଉକ୍ତ ଘାଟିରେ ଇଷ୍ଟର୍ଣ୍ଣ ରେଡ୍ ଅପେରା ପାର୍ଟିର ଦଶ ଚକିଆ ଟ୍ରକ୍ ନଂ ଓଆର ୦୧ ଏଫ୍ ୧୮୯୬ ରାଇରଙ୍ଗପୁରରୁ ଭଦ୍ରକ ଯାଉଥିବା ବେଳେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଛି । ଟ୍ରକଟି ରାସ୍ତା ପାଶ୍ୱର୍କୁ ଓଲଟି ପଡ଼ିବା ଫଳରେ ଡ୍ରାଇଭର ଓ ହେଲପର ଗୁରୁତର ଭାବେ ଆହତ ହୋଇଥିବା ସମୟରେ ଅନ୍ୟ ୫ ଜଣ ସାମାନ୍ୟ ଆହତ ହୋଇଛନ୍ତି । ଆହତମାନଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତି କରାଯାଇଛି । ଖବର ପାଇ ମହୁଲଡ଼ିହା ଥାନା ପୁଲିସ ଘଟଣାସ୍ଥଳରେ ପହଁଚିଥିବାର ସୂଚନା ମିଳିଛି ।
