ଭଦ୍ରକ,ଜଳିଗଲା ପ୍ଲାଷ୍ଟିକ ଗୋଦାମ । ଦୀର୍ଘ ତିନି ଘଂଟାର ଅକ୍ଳାନ୍ତ ପରିଶ୍ରମ ପରେ ନିଆଁକୁ ଆୟତ କରିଛି ଅଗ୍ନିଶମ ବାହିନୀ । ଭଦ୍ରକ ସହରର ପୁରୁଣାବଜାର ଥାନା ଅଧିନସ୍ଥ ହଳଦୀଡିହ ବାଇପାସ ଠାରେ ଏକ ପ୍ଲାଷ୍ଟିକ ଗୋଦାମରେ ଅଗ୍ନିକାଣ୍ଡ ଘଟି ଲକ୍ଷାଧିକ ଟଙ୍କାର ସମ୍ପତି ନଷ୍ଟ ହୋଇଛି ।
ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ କୌଣସି କାରଣବଶତଃ ପ୍ଲାଷ୍ଟିକ ଗୋଦାମରେ ନିଆଁ ଲାଗିଯାଇଥିଲା । ତେବେ ନିଆଁ ପ୍ରଖର ବେଗରେ ମାଡିଯାଇଥିବା ବେଳେ ଦମକଳ ବାହିନୀକୁ ଦୀର୍ଘ ସମୟ ଲାଗିଥିଲା ନିଆଁକୁ ଆୟତ କରିବା ପାଇଁ । ତେବେ ନିଆଁ ଆୟତ ହେବା ବେଳକୁ ଲକ୍ଷାଧିକ ଟଙ୍କାର ସମ୍ପତି ପୋଡ଼ି ପାଉଁଶ ହୋଇଯାଇଥିଲା । ଦମକଳ ବାହିନୀକୁ ଦୀର୍ଘ ୩ ଘଂଟା ଲାଗିଥିଲା ନିଆଁକୁ ଆୟତ କରିବା ପାଇଁ । ନିଆଁ ଆୟତ ହୋଇଥିଲା ସତ, କିନ୍ତୁ ଉକ୍ତ ପ୍ଲାଷ୍ଟିକ ଗୋଦାମରେ ସମସ୍ତ ସାମଗ୍ରୀ ପୋଡ଼ି ତରଳି ଯାଇଥିଲା । ଘଟଣାସ୍ଥଳରେ ପୁରୁଣା ବଜାର ପୋଲିସ ପହଂଚି ତଦନ୍ତ ଜାରୀ ରଖିଛି । କିପରି ଓ କେଉଁ ପରିସ୍ଥିତିରେ ନିଆଁ ଲାଗିଲା, ସେନେଇ ଛାନଭିନ୍ ଚଳାଇଛି ପୋଲିସ ।
