କୋରେଇ, ୧୬ ନମ୍ବର ଜାତୀୟ ରାଜପଥ ଟିକର ପୋଲ ଉପରେ ଗତକାଲି ରାତିରେ ଜଣେ ଗୃହରକ୍ଷୀଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଛି । ପ୍ରକାଶ ଯେ ପାଣିକୋଇଲି ଥାନା ଅନ୍ତର୍ଗତ ବ୍ରଜନଗର ଠାରୁ କୁଆଖିଆ ପର୍ଯ୍ୟନ୍ତ ଜାତୀୟ ରାଜପଥରେ ପେଟ୍ରୋଲିଂ କରୁଥିବା ଗାଡିଟି ସବୁଦିନ ପରି ଯାତାୟତ କରେ । ଏହି ଗାଡ଼ିରେ କୁଆଖିଆ ଥାନା ଅନ୍ତର୍ଗତ ମଧୁବନ ଗ୍ରାମର ଗୃହରକ୍ଷୀ ସତ୍ୟନାରାୟଣ ପଣ୍ଡା (୪୦) କାର୍ଯ୍ୟ କରୁଥିଲେ । ପାଣିକୋଇଲି ଥାନା ଅନ୍ତର୍ଗତ ଟିକର ପୋଲ ନିକଟରେ ପରିସ୍ରା କରିବାକୁ ଅଟକି ଥିବା ସମୟରେ ଏକ ଟ୍ରଲର ତାଙ୍କୁ ପଛ ପଟରୁ ଆସି ଧକ୍କା ମାରିଲା ଫଳରେ ସେ ତଳେ ଛିଟିକି ପଡ଼ିଥିଲେ । ଘଟଣାସ୍ଥଳରେ ସତ୍ୟନାରାୟଣଙ୍କ ମୃତ୍ୟୁ ହୋଇଥିଲା । ଖବର ପାଇ ପାଣିକୋଇଲି ପୁଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିବା ସହିତ ଗାଡ଼ି ଓ ଡ୍ରାଇଭରକୁ ଅଟକ ରଖିଛି । ପୁଲିସ ଘଟଣାର ତଦନ୍ତ ଆରମ୍ଭ କରିଛି ।
