ଭୁବନେଶ୍ୱର, ସିପିଆଇର ପୂର୍ବତନ ରାଜ୍ୟ କାର୍ଯ୍ୟକାରୀ ସମ୍ପାଦକ, ଓଡ଼ିଶାର ବିଶିଷ୍ଟ ଶ୍ରମିକ ନେତା, ବିପ୍ଳବୀ ଅକ୍ଷୟ କୁମାର ପ୍ରଧାନଙ୍କ ୨୧ତମ ରାଜ୍ୟସ୍ତରୀୟ ସ୍ମୃତି ସମାରୋହ ଭୁବନେଶ୍ୱର ଠାରେ ପାଳିତ ହୋଇଯାଇଛି । ସ୍ମୃତି କମିଟିର ଅଧ୍ୟକ୍ଷ ତଥା ବରିଷ୍ଠ ସିପିଆଇ ନେତା ଦିବାକର ନାୟକଙ୍କ ସଭାପତିତ୍ୱରେ ଅନୁଷ୍ଠିତ ଏହି ସମାରୋହରେ ସ୍ମୃତି କମିଟିର ସମ୍ପାଦକ ମହେଶ୍ୱର ରାଉତ ପ୍ରାରମ୍ଭିକ ସୂଚନା ଦେବା ପରେ ସିପିଆଇର ରାଜ୍ୟ ସମ୍ପାଦକ ଆଶିଷ କାନୁନ୍ଗୋ, ସିପିଆଇ(ଏମ୍)ର ରାଜ୍ୟ ସମ୍ପାଦକ ଅଳି କିଶୋର ପଟ୍ଟନାୟକ, ସିପିଆଇ ଜାତୀୟ କାର୍ଯ୍ୟକାରିଣୀ ସଭ୍ୟ ରାମକୃଷ୍ଣ ପଣ୍ଡା ଓ ବରିଷ୍ଠ ସାମ୍ବାଦିକ ପ୍ରଦୋଷ ପଟ୍ଟନାୟକ ପ୍ରୟାତ ନେତାଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
ଏହି ସମାରୋହରେ ଓଡ଼ିଶାର ବିଶିଷ୍ଟ କମ୍ୟୁନିଷ୍ଟ ଓ ଶ୍ରମିକ ନେତା ପ୍ରଶାନ୍ତ ପାଟ୍ଟଯୋଷୀ, ଓଡ଼ିଶାର କମ୍ୟୁନିଷ୍ଟ ଓ ମହିଳା ଆନ୍ଦୋଳନର ବରିଷ୍ଠ ନେତ୍ରୀ ବନଲତା ଜେନା, ବିଶିଷ୍ଟ କୃଷକ ନେତା ସନାତନ ପାତ୍ର ଓ ସିପିଆଇ ପୁରୀ ଜିଲ୍ଲା ସମ୍ପାଦକ ପ୍ରଦୀପ୍ତ କୁମାର ମହାନ୍ତିଙ୍କୁ ୨୦୨୧ ମସିହାର ଅକ୍ଷୟ ସମ୍ମାନ ଅର୍ପଣ କରାଯାଇଥିଲା ।
ଅନ୍ୟମାନଙ୍କ ମଧ୍ୟରେ ଅକ୍ଷୟ ପ୍ରଧାନଙ୍କର ବାଲ୍ୟ ବନ୍ଧୁ ଦେବେନ୍ଦ୍ର କୁମାର ସାହୁ, କୃଷକ ନେତା କୃଷ୍ଣ ଚନ୍ଦ୍ର ରାଉତ ଶ୍ରଦ୍ଧାଞ୍ଜଳି ଅର୍ପଣ କରିଥିବାବେଳେ ଅକ୍ଷୟ ପ୍ରଧାନଙ୍କ ସହଧର୍ମିଣୀ ପ୍ରତିମା ପ୍ରଧାନ ମଂଚାସୀନ ଥିଲେ । ଏହି ସମାରୋହରେ ଓଡ଼ିଶାର ବିଭିନ୍ନ ପ୍ରାନ୍ତରୁ ବହୁ ପ୍ରତିନିଧି ଅଂଶ ଗ୍ରହଣ କରିଥିଲେ ।
