ପାରଳାଖେମୁଣ୍ଡି,ଗଜପତି ଜିଲା ଆର. ଉଦୟଗିରି ବ୍ଲକ ଅନ୍ତର୍ଗତ ପୋଇପଦର ଗ୍ରାମ ନିକଟରୁ ଜବତ ହୋଇଛି ବିପୁଳ ପରିମାଣର ଗଞ୍ଜେଇ । ଗଜପତି ଜିଲା ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶ ପ୍ରକାରେ ଆର. ଉଦୟଗିରି ପୋଲିସ ପେଟ୍ରୋଲିଂ କରି ଜବତ କରିଛି ଏହି ଗଞ୍ଜେଇ । ଗତକାଲି ସନ୍ଧ୍ୟା ସମୟରେ ଥାନା ଏସଆଇ ହେମନ୍ତ କୁମାର ସେଠୀ ସେହି ଅଂଚଳରେ ରାତ୍ର ପେଟ୍ରୋଲିଂ କରୁଥିବା ସମୟରେ ନିଜ ସହକର୍ମୀଙ୍କ ସହ କାର୍ଯ୍ୟ ସମ୍ପାଦନ ସାରି ନିଜ କର୍ମ ସ୍ଥଳୀକୁ ଫେରିବା ସମୟରେ ପୋଇପଦର ଗ୍ରାମର କିଛି ଦୂରରେ ଦୁଇ ଜଣ ବ୍ୟକ୍ତି କିଛି ଅଖା ଭର୍ତ୍ତି ଜିନିଷ ଉପରେ ବସିଥିଲେ । ସେହି ଦୁଇଜଣ ବ୍ୟକ୍ତି ପୋଲିସକୁ ଦେଖି ଦୌଡ଼ି ପଳାଇଯିବାକୁ ଉଦ୍ୟମ କରିଥିଲେ । ସେହି ଦୁଇଜଣ ବ୍ୟକ୍ତି ଦୌଡ଼ି ଯିବାର ଦେଖି ପୋଲିସ ତାଙ୍କ ପିଛା କରି ସେହି ଦୁଇଜଣ ବ୍ୟକ୍ତିଙ୍କୁ ଧରିବାରେ ସକ୍ଷମ ହୋଇଥିଲେ । ସେହି ଦୁଇ ଜଣଙ୍କୁ ଧରି ତଦନ୍ତ କରିବାରୁ ସେମାନଙ୍କ ପାଖରେ ଥିବା ସେହି ବାରଟି ଅଖାରେ ଗଞ୍ଜେଇ ଭର୍ତ୍ତି ଥିଲା । ଜବତ ଗଞ୍ଜଇ ୩୯୧ କେଜି ୮୮୦ ଗ୍ରାମ ରହିଛି । ଘଟଣାରେ ଦୁଇ ଅଭିଯୁକ୍ତ ସେହି ଗ୍ରାମର ଜୋସେଫ ରାଇତ ଏବଂ ଅନ୍ୟ ଜଣେ ମୋହନ ମାଝୀଙ୍କୁ ପୋଲିସ ଗିରଫ କରିଛି । ପୋଲିସ ଏହି ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଥାନା ଅଧିକାରୀ ରବୀନ୍ଦ୍ର କୁମାର ପଣ୍ଡା ଏନେଇ ଅଧିକ ତଦନ୍ତ କରୁଥିବା ପ୍ରକାଶ । ଆର. ଉଦୟଗିରି ଥାନା ପୋଲିସ ଏ ସଂକ୍ରାନ୍ତରେ କେସ ନମ୍ବର୧୪୦/୨୦୨୧ରେ ଏକ ମାମଲା ରୁଜ୍ଜୁ କରିଛି ।
