ଧର୍ମଶାଳା, ଯାଜପୁର ଜିଲା ଧର୍ମଶାଳା ବ୍ଲକ ମଙ୍ଗଳପୁର ପଂଚାୟତସ୍ଥ କୋଠଡିହ ଗ୍ରାମରେ ଗତକାଲି ରାତିରେ ଘଟିଛି ଅଘଟଣ । ଅଗ୍ନିକାଣ୍ଡ ଘଟି ୨ ବଖରା ଚାଳ ଛପର ଘର ପୋଡି ପାଉଁଶ ହୋଇଯାଇଛି । ଅଗ୍ନିକାଣ୍ଡରେ ଘରର ସମସ୍ତ ଆବସବାସପତ୍ର ପୋଡି ପାଉଁଶ ହୋଇଯାଇଥିବା ବେଳେ ୨ଟି ଗାଈ ଗୁରୁତର ହୋଇଥିବା ଜଣାପଡିଛି ।
ସୂଚନା ମୁତାବକ ଗତକାଲି ରାତିରେ କୌଣସି କାରଣରୁ କୋଠଡିହ ଗ୍ରାମର ତପନ ମଲିକଙ୍କ ୨ ବଖରା ଛପର ଘରେ ନିଆଁ ଲାଗି ଯାଇଥିଲା । ନିଆଁ ହୁତୁହୁତୁ ହୋଇ ଜଳୁଥିବା ଦେଖି ଗ୍ରାମବାସୀ ନିଆଁକୁ ଆୟତ କରିବାକୁ ଚେଷ୍ଟା କରିଥିଲେ । ହେଲେ ବହୁ ବିଳମ୍ବ ପରେ ନିଆଁକୁ ଆୟତ କରିଥିଲେ ମଧ୍ୟ ଘର ଭିତରରେ ଥିବା କୌଣସି ଆସବାସପତ୍ର ଉଦ୍ଧାର କରିପାରି ନ ଥିଲେ । ଅନ୍ୟ ଏକ ଘର ଭିତରେ ୨ଟି ଗାଈକୁ ଉଦ୍ଧାର କରିଥିଲେ । ଗାଈ ଗୁଡିକ ଆହତ ହୋଇଥିବା ଜଣାପଡିଛି । ଅଗ୍ନିବିପନ୍ନ ପରିବାରଙ୍କୁ ତୁରନ୍ତ ସରକାରୀ ସହାୟତା ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି ।
