କଟକ ,ବିଶିଷ୍ଟ ଶିକ୍ଷାବିତ ଡକ୍ଟର ନାରାୟଣ ମହାନ୍ତି ଚଳିତ ବର୍ଷ ଉତ୍କଳ ସାହିତ୍ୟ ସମାଜ ପକ୍ଷରୁ ପ୍ରଭା ପଟେଲ ରମ୍ୟରଚନା ଓ ଲଳିତ ନିବନ୍ଧ ସମ୍ମାନ ପାଇବାକୁ ମନୋନୀତ ହୋଇଛନ୍ତି । ଆସନ୍ତା ୩୧ ତାରିଖ ସନ୍ଧ୍ୟାରେ ବାଣୀପୀଠ ଶ୍ରୀରାମଚନ୍ଦ୍ର ଭବନଠାରେ ଅନୁଷ୍ଠିତ ହେବାକୁ ଯାଉଥିବା ଉତ୍କଳ ସାହିତ୍ୟ ସମାଜର ୧୧୯ତମ ବାର୍ଷିକ ସମାବର୍ତ୍ତନ ଉତ୍ସବରେ ଡକ୍ଟର ମହାନ୍ତିଙ୍କୁ ଏହି ସମ୍ମାନ ପ୍ରଦାନ କରାଯିବ ।
୨୦୦୪ ମସିହାଠାରୁ ଡକ୍ଟର ମହାନ୍ତିଙ୍କ ଲିଖିତ ରମ୍ୟରଚନାଗୁଡ଼ିକ ବିଭିନ୍ନ ଦୈନିକ ସମ୍ବାଦପତ୍ର ତଥା ମାସିକ ଓ ସାପ୍ତାହିକ ପତ୍ରପତ୍ରିକାର ପୃଷ୍ଠା ମଣ୍ଡନ କରିଆସୁଛି । ତାଙ୍କର ୪୫ଟି ସୁନିର୍ବାଚିତ ରମ୍ୟରଚନାକୁ ନେଇ ଏକ ସଂକଳନ ‘ମହାମନ୍ତ୍ରୀ ଉବାଚ’ ଚଳିତବର୍ଷ ପ୍ରକାଶିତ ହୋଇଛି । କଟକ ଜେକେବିକେ ସରକାରୀ କଲେଜର ତର୍କ ଓ ଦର୍ଶନ ବିଭାଗର ପ୍ରାଧ୍ୟାପକ ତଥା ମୁଖ୍ୟ ଭାବେ ୨୦୧୪ ଫେବ୍ରୁଆରିରେ ଅବସର ନେଇଥିବା ଡକ୍ଟର ମହାନ୍ତି ମର୍କତନଗର (ସିଡିଏ) ବାସଭବନରେ ଅବସ୍ଥାନ କରୁଛନ୍ତି ।
