ନୂଆପଡା,ନୂଆପଡା ଜିଲ୍ଲା ସିନାପାଲି ବ୍ଲକ ଅନ୍ତର୍ଗତ ବୈଗାପଡା ଗ୍ରାମର ଅବସରପ୍ରାପ୍ତ ଆଦର୍ଶ ଶିକ୍ଷକ ସ୍ବର୍ଗତ ବେଣୁଧର ଗହୀରଙ୍କ ଗଙ୍ଗାଶ୍ରାଦ୍ଧ ଅବସରରେ ବୃକ୍ଷ ରୋପଣ କରାଯାଇଥିଲା। ଏହି ଅବସରରେ ମୁଖ୍ୟ ଅତିଥି ଭାବରେ ନୂଆପଡା ବିଜେପି ଜିଲ୍ଲା ସଭାପତି ସୁବ୍ରତ କୁମାର ଠାକୁର, ବିଶିଷ୍ଟ ଅତିଥି ଶିକ୍ଷାବିତ ପ୍ରେମସିନ୍ଧୁ ହେର୍ଣ୍ଣା, ମୋହନ ଚରଣ ଦାସ, ଚନ୍ଦ୍ର କୁମାର ଧୀବର, କ୍ଷମାଧର ନିଆଲ ପ୍ରମୁଖ ଯୋଗଦାନ କରିଥିଲେ। ସ୍ବର୍ଗତ ଶ୍ରୀଗହୀରଙ୍କ ସ୍ମୃତିରେ ଦୁଇ ଏକର ଜାଗାରେ ବେଣୁଧର ବାଟିକା ନାମକ ଏକ ବଗିଚା ନିର୍ମାଣ କରାଯାଇଛି। ଉକ୍ତ ବାଟିକାରେ ଖଇର, ଦେବଦାରୁ, ବରଗଛ ଭଳି ଅନେକ ପ୍ରକାରର ବୃକ୍ଷ ବିଶ୍ୱକଲ୍ୟାଣ ନିମନ୍ତେ ଅତିଥୀଙ୍କ ଉପସ୍ଥିତିରେ ରୋପଣ କରାଯାଇଥିଲା। ଏହି ଅବସରରେ ଭଜନ କୀର୍ତ୍ତନ ଓ ସ୍ବର୍ଗତ ଶ୍ରୀଗହୀରଙ୍କ ଉଦ୍ଧେଶ୍ୟରେ ଏକ ସ୍ମୃତିସଭାର ଆୟୋଜନ କରାଯାଇଥିଲା। ଅନ୍ୟମାନଙ୍କ ମଧ୍ୟରେ ନୂଆପଡା ବିଜେଡି ଜିଲା ସାଧାରଣ ସମ୍ପାଦକ ଲମ୍ବୋଦର ନିଆଲ, ଅଧ୍ୟାପକ ଜ୍ୟୋତିର୍ଣ ବନ୍ଦୀଛୋର, ଯୋଗେଶ୍ୱର ବୈଠାରୁ, ତ୍ରିନାଥ ପୁଞ୍ଜି ପ୍ରମୁଖ ସ୍ବର୍ଗତ ଗୁରୁଙ୍କ ଆଦର୍ଶ ସାମାଜିକ ତଥା ଧାର୍ମିକ ଜୀବନ ଉପରେ ସ୍ମୃତି ଚାରଣ କରିଥିଲେ। ଉକ୍ତ କାର୍ଯ୍ୟକ୍ରମକୁ ଶ୍ରୀଗହୀରଙ୍କ ସୁପୁତ୍ର ସତ୍ୟବ୍ରତ ଗହୀର ଆୟୋଜନ କରିଥିବା ବେଳେ ଗିରିଧାରୀ ତାଣ୍ଡି, ଜଗନ୍ନାଥ ବେମାଲ, ଲେଖନ୍ ହଂସ, ବିଘ୍ନରାଜ ବାଗ ପ୍ରମୁଖ ସହଯୋଗ କରିଥିଲେ ।
