ସୁନ୍ଦରଗଡ଼, ଘରେ ପଶି ବୃଦ୍ଧ ଦମ୍ପତିଙ୍କୁ କେହି ହତ୍ୟା କରିଛି । ଦମ୍ପତିଙ୍କ ରକ୍ତ ଜୁଡ଼ୁବୁଡ଼ୁ ମୃତଦେହ ଘରେ ପଡି ରହିଥିବା ବେଳେ ମୃତ୍ୟୁର କାରଣ ଅସ୍ପଷ୍ଟ ରହିଛି । ସୁନ୍ଦରଗଡ଼ ଜିଲ୍ଲା ରାଏବଗା ଥାନା କାଦୋବାହାଲ ପଚାଂୟତ ଅଧିନସ୍ଥ ଭଦ୍ରାଟୋଲୀ ବସ୍ତିରେ ଗତକାଲି ରାତିରେ ଘଟିଯାଇଛି ଏଭଳି ଏକ ବିଭତ୍ସ ହତ୍ୟାକାଣ୍ଡ ।
ସୂଚନା ଅନୁଯାୟୀ, ବୃଦ୍ଧ ଦମ୍ପତିଙ୍କର ୩ ପିଲା ବାହାରେ ରହୁଥିବା ବେଳେ ସେମାନେ ଏକାକୀ ଥିବାର ସୁଯୋଗ ନେଇ କେହି ଦୁର୍ବୃତ ଘରେ ପଶି ଉଭୟଙ୍କୁ କୌଣସି ଧାରୁଆ ଅସ୍ତ୍ରରେ ହାଣିଥିବା ଅନୁମାନ କରାଯାଉଛି । ତେବେ ଅତ୍ୟଧିକ ରକ୍ତସ୍ରାବ ଯୋଗୁଁ ଘଟଣାସ୍ଥଳରେ ଉଭୟ ସ୍ୱାମୀ ସ୍ତ୍ରୀଙ୍କ ମୃତ୍ୟୁ ଘଟିଛି । ଖବର ପାଇ ରାଏବଗା ପୋଲିସ ଓ ବୀରମିତ୍ରପୁର ଏସଡ଼ିପିଓ ଘଟଣାସ୍ଥଳରେ ପହଂଚି ସାଇଂଟିଫିକ୍ ଟିମ୍ ସହାୟତାରେ ଛାନଭିନ୍ ଜାରୀ ରଖିଛନ୍ତି । ତେବେ କିଏ ଓ କାହିଁକି ଏହି ବୃଦ୍ଧ ଦମ୍ପତିଙ୍କୁ ହତ୍ୟା କଲା ପୋଲିସ ସେନେଇ ଖୋଳତାଡ଼ କରୁଛି ।
