ମାଲକାନଗିରି, ନକଲି ବନ୍ଧୁକ ଧରି ଚୋରି କରିବାକୁ ଆସିଥିବା ଚୋର ହେଲେ ହଟହଟା । ନକଲି ବନ୍ଧୁକଧାରୀ ଚୋରଙ୍କୁ କାବୁ କଲେ ଗ୍ରାମବାସୀ । ଏମିତି କିଛି ଦୃଶ୍ୟ ଦେଖିବାକୁ ମିଳିଛି ମାଲକାନଗିରି ଥାନା ଅନ୍ତର୍ଗତ ଉଡୁପା ଗାଁରେ । ଗତକାଲି ବିଳମ୍ବିତ ରାତିରେ ସୀମାନ୍ତ ଛତିଶଗଡ଼ ରାଜ୍ୟ ନାରାୟଣପୁର ଅଞ୍ଚଳର କିଛି ଚୋର ଉଡୁପା ଗାଁକୁ ଚୋରି କରିବା ଉଦ୍ଦେଶ୍ୟରେ ପଶିଥିଲେ ।
ଚୋରଙ୍କୁ ଦେଖି ଗାଁର କିଛି ଲୋକ ସେମାନଙ୍କୁ କାବୁ କରିବାକୁ ଉଦ୍ୟମ କରିଥିଲେ । କିନ୍ତୁ, ସେମାନେ ନକଲି ବନ୍ଧୁକ ଦେଖାଇ ଭୟଭୀତ କରି ଖସି ଯିବାକୁ ଚେଷ୍ଟା କରିଥିଲେ । ୭ ଜଣ ଚୋରଙ୍କ ମଧ୍ୟରୁ ୪ ଜଣ ଚମ୍ପଟ ମାରିଥିଲେ । ହେଲେ ତିନି ଜଣଙ୍କୁ ଧରିବାରେ ସକ୍ଷମ ହେଲେ ଗାଁ ଲୋକ । ଏହା ପରେ ଗାଁ ଲୋକ ମାଲକାନଗିରି ଆଦର୍ଶ ଥାନାକୁ ଖବର ଦେଇଥିଲେ ।ଖବର ପାଇ ପୋଲିସ ପହଞ୍ଚି ସେମାନଙ୍କ ପାଖରୁ ୩ଟି ନକଲି ବନ୍ଧୁକ ଜବତ କରି ଚୋରଙ୍କୁ ଥାନାକୁ ଆଣି ପଚରାଉଚରା କରୁଥିବା ଜଣାପଡିଛି ।
