ନୂଆପଡ଼ା, ନୂଆପଡ଼ା ଜିଲ୍ଲା ସିନାପାଲିରେ ଏକ ସଦର ଷ୍ଟାଡିଅମ ନିର୍ମାଣ ପାଇଁ ପିସିସି ସଦସ୍ୟ ଲିଙ୍ଗରାଜ ଘିଭେଳାଙ୍କ ନେତୃତ୍ୱରେ ଏକ ଯୁବଗୋଷ୍ଠୀ ଖଡ଼ିଆଳ ବିଧାୟକଙ୍କୁ ଏ ସମ୍ବଳିତ ଏକ ଦାବିପତ୍ର ପ୍ରଦାନ କରିଛନ୍ତି । ପୂର୍ବରୁ ଜିଲାପାଳ ନୂଆପଡାଙ୍କ ନିର୍ଦେଶ କ୍ରମେ ସଦର କାପସି ଗ୍ରାମ ସ୍ଥିତ ପ୍ରସ୍ତାବିତ ସିନାପାଲି ଷ୍ଟାଡିଅମ ପାଇଁ ଜମି ଚିହ୍ନଟ ହୋଇସାରିଛି । ହେଲେ ସେଥି ପ୍ରତି କାହାରି ନଜର ପଡୁନଥିବା ବେଳେ ଦୈନନ୍ଦିନ କ୍ରୀଡ଼ାଭ୍ୟାସ କରୁଥିବା ଅଞ୍ଚଳର କ୍ରୀଡ଼ାବିତ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଅଞ୍ଚଳର କ୍ରୀଡ଼ାବିତ ମାନଙ୍କ ସମସ୍ୟା ବାବଦରେ ଅବଗତ ହେଲାପରେ ବିଧାୟକ ସିନାପାଲି ସଦର ଷ୍ଟାଡିଅମ ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିବା ସହ ଓଡିଶା କ୍ରୀଡ଼ା ମନ୍ତ୍ରଣାଳୟରୁ ପାଣ୍ଠି ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଥିବା ଜଣାପଡିଛି । ବିଧାୟକଙ୍କ ପ୍ରତିଶ୍ରୁତି ପରେ ସିନାପାଲି ଅଞ୍ଚଳର କ୍ରୀଡ଼ାବିତ ଓ ଯୁବଗୋଷ୍ଠୀ ମଧ୍ୟରେ ଖୁସିର ଲହରୀ ଖେଳିଯାଇଛି । ସଦର ଷ୍ଟାଡିଅମ ନିର୍ମାଣ ହେଲେ ଅଞ୍ଚଳର କ୍ରୀଡ଼ାବିତ ମାନଙ୍କ ବହୁବିଧ ଅସୁବିଧା ଦୂର ହୋଇପାରିବ ବୋଲି ମତ ପ୍ରକାଶ ପାଇଛି ।
ଏହି ଦାବିପତ୍ର ପ୍ରଦାନ ସମୟରେ ପିସିସି ସଦସ୍ୟ ତଥା ପୂର୍ବତନ ଜିଲ୍ଲା ପରିଷଦ ଲିଙ୍ଗରାଜ ଘିଭେଳାଙ୍କ ସମେତ କ୍ରୀଡ଼ାବିତ ପ୍ରକାଶ ପାତ୍ର, ନରେଶ ମାଝୀ, ବିହାରିଲାଲ ମିଶ୍ରା, ସୁନୀଲ ମେହେର, ନରେଶ ମେହେର ପ୍ରମୁଖ ଉପସ୍ଥିତ ଥିଲେ ।
