ଗଞ୍ଜାମ – ଆସିକା ପୋଲିସ ଥାନା ଅଂଚଳରେ ପୁଣି ଏକ ଏନକାଉଂଟରରେ ଦୁର୍ଦ୍ଦାନ୍ତ ଅପରାଧୀ ପି. ଶିବଶଙ୍କର ଦୋରା ଓରଫ ଟିଙ୍ଗିରି ଦୋରା (୩୨) ଆହତ ହୋଇଛି । ତା’ର ବାମ ଗୋଡର ଆଣ୍ଠୁରେ ଗୁଳି ବାଜିଛି । ଗୁରୁତର ଆହତ ଟିଙ୍ଗିରିକୁ ଚିକିତ୍ସା ନିମନ୍ତେ ବ୍ରହ୍ମପୁର ବଡ ଡାକ୍ତରଖାନାରେ ଭର୍ତି କରାଯାଇଛି ।
ଗତକାଲି ରାତିରେ ଟିଙ୍ଗିରି ପାଣ୍ଡିଆପଥର ଗ୍ରାମରେ ବଳରାମ ସେଠୀ ନାମକ ଜଣେ ବ୍ୟକ୍ତିଙ୍କୁ ଗୁଳି ମାଡ କରିଥିଲା । ଖବର ପାଇ ଆସିକା ପୋଲିସ ଘଟଣାର ତଦନ୍ତ ଆରମ୍ଭ କରିବା ସହ ଟିଙ୍ଗିରିକୁ ଧରିବାକୁ ଉଦ୍ୟମ ଚଳାଇଥିଲା । ବିଳମ୍ବିତ ରାତିରେ ପୋଲିସ ତାକୁ ଚାରିମାଇଲ୍ ଛକ ନିକଟରେ କାବୁ କରିବାକୁ ଉଦ୍ୟମ କରିବା ବେଳେ ସେ ପ୍ରଥମେ ପୋଲିସ ଉପରକୁ ଗୁଳି ଚଳାଇଥିଲା । ପୋଲିସର ପାଲଟା ଜବାବରେ ସେ ଆହତ ହୋଇଥିଲା । ଅପରାଧୀ ଟିଙ୍ଗିରି ନିକଟରୁ ଗୋଟିଏ ମାଉଜର ଓ ଗୋଟିଏ ବାଇକ୍ ଜବତ ହୋଇଛି । ତା’ ନାମରେ ଜିଲ୍ଲାର ବିଭିନ୍ନ ଥାନାରେ ଏକାଧିକ ଅପରାଧିକ ମାମଲା ରହିଛି । ସେହିପରି ଟିଙ୍ଗିରି ଗୁଳିରେ ଆହତ ବଳରାମଙ୍କୁ ମଧ୍ୟ ଚିକିତ୍ସା ନିମନ୍ତେ ବ୍ରହ୍ମପୁର ବଡ ମେଡିକାଲରେ ଭର୍ତି କରାଯାଇଛି ।
