ପଟ୍ଟାମୁଣ୍ଡାଇ, କେନ୍ଦ୍ରାପଡା ଜିଲ୍ଲା ଆଳି ଥାନା ଅନ୍ତର୍ଗତ ନୂଆପଡା ଗାଁରେ ଆଜି ଏକ ଅଘଟଣ ଘଟିଯାଇଛି । ବିଦ୍ୟୁତ ଆଘାତରେ ଦୁଇଟି ଗାଈଙ୍କର ଜୀବନ ଯାଇଛି । ନୂଆପଡା ଗ୍ରାମରେ ଥିବା ଏକ ଖୋଲା ଟ୍ରାନ୍ସଫର୍ମର ନିକଟରେ ତାରଛିଣ୍ଡି ପଡିଥିଲା । ବିଦ୍ୟୁତ ବିଭାଗ ଏହାର ମରାମତି କରି ନଥିଲା । ନୂଆପଡା ଗାଁର ଅର୍ଜୁନ ଦାସ ଓ ଅମୂଲ୍ୟ ଦାସଙ୍କର ୨ଟି ଗାଈ ଏହି ବିଦ୍ୟୁତ ଚାର୍ଜଥିବା ତାରରେ ଲାଗିଯାଇଥିଲେ । ଚାହୁଁ ଚାହୁଁ ଛଟପଟ ହୋଇ ୨ଟି ଗାଈଙ୍କ ଜୀବନ ଚାଲିଯାଇଛି । ଗାଈଙ୍କ ମୃତ୍ୟୁ ପରେ ଗାଁରେ ଉତେଜନା ଲାଗିରହିଛି । ଗାଁର ଶତାଧିକ ଲୋକେ ବିଦ୍ୟୁତ ବିଭାଗର ଅବହେଳାକୁ ପ୍ରତିବାଦ କରିଛନ୍ତି । ଗାଈ ମୃତ୍ୟୁର କ୍ଷତିପୂରଣ ଦାବିରେ ଟାୟାର ଜାଳି ନୂଆପଡା ମୁଖ୍ୟ ରାସ୍ତାକୁ ଅବରୋଧ କରିଛନ୍ତି ।
