ପୁରୀ, ଜନ୍ମାଷ୍ଟମୀ ଅବସରରେ ଗତକାଲି ବିଳମ୍ବିତ ରାତିରେ ଶ୍ରୀମନ୍ଦିରରେ କୃଷ୍ଣଜନ୍ମ ନୀତି ସମାପନ ହୋଇଥିଲା । ଆଜି ଭାଦ୍ରବ ମାସ କୃଷ୍ଣ ପକ୍ଷ ନବମୀ ତିଥି, ନନ୍ଦୋତ୍ସବ । ଏହି ପବିତ୍ର ତିଥିରେ ଜଗମୋହନର ଦୋଳିରେ ଝୁଲୁଛନ୍ତି କୃଷ୍ଣ ବଳରାମ । ଆଜି ଭୋଗ ମଣ୍ଡପ ଶେଷ ହେବା ପରେ ମଇଲମ, ମହାସ୍ନାନ, ସର୍ବାଙ୍ଗ ଆଦି ନୀତି ସମ୍ପନ୍ନ ହୋଇ ମହାଲକ୍ଷ୍ମୀଙ୍କ ମନ୍ଦିରକୁ ବିଜେ କରିବେ ମଦନ ମୋହନ । ସେଠାରେ ନନ୍ଦରାଜାଙ୍କ ସମ୍ମୁଖରେ ମହାଭୋଇ ସେବକ ଗାଈ ଠାରୁ କ୍ଷୀର ଦୁଇଁବା ପରେ ନନ୍ଦରାଜା କ୍ଷୀରକୁ ସମର୍ପଣ କରିବେ । ଏହାପରେ ନନ୍ଦ ଉତ୍ସବ ନୀତି ସମାପନ ହେବ ।
