-
ଜମିଜମା ବିବାଦ କାରଣରୁ ହତ୍ୟା ଅଭିଯୋଗ
ଗଞ୍ଜାମ, ଗଞ୍ଜାମ ଜିଲ୍ଲା ବଡଗଡ଼ ଥାନା ଅନ୍ତର୍ଗତ ଗୋପାଳପୁର ଗ୍ରାମରେ ଗତକାଲି ବିଳମ୍ବିତ ରାତିରେ ଘଟିଯାଇଛି ଏକ ବିଭତ୍ସ ହତ୍ୟାକାଣ୍ଡ । କାଶୀନାଥ ଗୌଡ଼ ନାମକ ଜଣେ ୬୦ ବର୍ଷିୟ ବୃଦ୍ଧ ନିଜ ଘର ବାରଣ୍ଡାରେ ଖଟିଆରେ ଶୋଇଥିବା ବେଳେ କୌଣସି ନୃଶଂସ ବ୍ୟକ୍ତି ତାଙ୍କୁ ଧାରୁଆ ଅସ୍ତ୍ରରେ ହାଣି ହତ୍ୟା କରିଥିବା ଜଣାପଡିଛି ।
ଆଜି ସକାଳେ କାଶୀନାଥଙ୍କ ପତ୍ନୀ ବଡଗଡ଼ ଥାନାରେ ଅଭିଯୋଗ କରିଛନ୍ତି ଯେ, ତାଙ୍କ ସ୍ୱାମୀଙ୍କୁ କେହି ଦୁର୍ବୃତ ହତ୍ୟା କରିଛି । ଜମିଜମା ବିବାଦ କାରଣରୁ ତାଙ୍କୁ ହତ୍ୟା କରାଯାଇଥିବା ସେ ଏତଲାରେ ଦର୍ଶାଇଛନ୍ତି । ବଡଗଡ଼ ପୋଲିସ ଘଟଣାସ୍ଥଳରେ ପହଂଚି ମୃତକଙ୍କ ଶବ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ଭଞ୍ଜନଗର ଡ଼ାକ୍ତରଖାନାକୁ ପଠାଇଛି । ପୋଲିସ ଏ ସଂକ୍ରାନ୍ତରେ ଏକ ହତ୍ୟା ମାମଲା ରୁଜ୍ଜୁ କରି ତଦନ୍ତ ଚଳାଇଛି ।
