ଗଞ୍ଜାମ, ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ନିମୁଣ୍ଡିଆଗୁଡିପାଲି ଗାଁ ପୋଖରୀରେ ଆଜି ସକାଳେ ଜଣେ ମହିଳା ଗାଧୋଉଥିବା ବେଳେ ପୋଖରୀ ପାହଚରୁ ଗୋଡ ଖସି ଯିବାରୁ ଗଭୀର ଜଳରାଶି ମଧ୍ୟକୁ ଚାଲିଯାଇଥିଲେ । ଗ୍ରାମବାସୀଙ୍କ ସହାୟତାରେ ପାଣିରୁ ତାଙ୍କୁ ଉଦ୍ଧାର କରାଯାଇ କବିସୂର୍ଯ୍ୟନଗର ଡ଼ାକ୍ତରଖାନାରେ ଭର୍ତି କରାଯାଇଥିଲା । ହେଲେ ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ମୃତ ମହିଳା ଜଣକ ହେଲେ ଯାମୁନି ଡାକୁଆ (୪୧) । ଖବର ପାଇ କବିସୂର୍ଯ୍ୟନଗର ଥାନା ଅଧିକାରୀ ସଦଳବଳେ ଘଟଣାସ୍ଥଳରେ ପହଂଚି ମୃତ ମହିଳାଙ୍କ ଶବ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ଆସିକା ଡ଼ାକ୍ତରଖାନାକୁ ପଠାଇଛନ୍ତି । ଥାନା ପକ୍ଷରୁ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜ୍ଜୁ ହୋଇଛି । ବାଲିଛାଇ ଫାଣ୍ଡି ଓ କବିସୂର୍ଯ୍ୟନଗର ଥାନା ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
