ଗଞ୍ଜାମ, ଗଞ୍ଜାମ ଜିଲ୍ଲାର ଜଗନ୍ନାଥପ୍ରସାଦ ବନାଚଂଳ ପକ୍ଷରୁ ଗତକାଲି ରାତିରେ ପାଟ୍ରୋଲିଂବେଳେ ଲଙ୍କାଗଡ଼ ଘାଇ ନିକଟରୁ ଜଣେ ଶିକାରୀଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତ ଜଣକ ହେଲେ ଡୁଙ୍ଗାପଲ୍ଲୀ ଗ୍ରାମର ଶୁକୁଟା ବେହେରା । ଅଭିଯୁକ୍ତ ନିକଟରୁ ପ୍ରାୟ ୨ କେଜି ଓଜନର ଜିଆଇ ତାର, କିଛି ଛୋଟ କାଠ ଖୁଂଟ ଓ ବୋତଲ ଜବତ ହୋଇଛି । ଭାଲୁ ମୁଣ୍ଡିଆ ମଧ୍ୟରେ ତାର ବିଛା ଯାଇଥିବାରୁ କର୍ମଚାରୀ ମାନେ ସାରା ରାତି ସେଠାରେ ଜଗି ରହିଥିଲେ । ସକାଳେ ଶୁକୁଟା ବିଛାଯାଇଥିବା ତାରକୁ ବାହାର କରୁଥିବା ବେଳେ ବିଭାଗୀୟ କର୍ମଚାରୀ ମାନେ ତାକୁ କାବୁ କରି ନେଇଥିଲେ । ଜଗନ୍ନାଥପ୍ରସାଦ ବନାଚଂଳରେ ଗତ କିଛି ଦିନ ହେଲା ଶିକାରୀ ସକ୍ରିୟ ହୋଇ ଉଠିଛନ୍ତି । ସେମାନେ ଅନାୟାସରେ ତାର ବିଛାଇ ବନ୍ୟଜନ୍ତୁ ଶିକାର କରୁଛନ୍ତି । ଗିରଫ ହୋଇ ଜାମିନ୍ ରେ ଆସିବା ପରେ ଏହି ଶିକାରୀ ପୁଣି ଥରେ ଏଭଳି ବେଆଇନ କାର୍ଯ୍ୟ ଜାରୀ ରଖୁଥିବାର ନଜିର ରହିଛି ।
