ନିମାପଡ଼ା – ପିପିଲି- ନିମାପଡା ମୁଖ୍ୟ ରାସ୍ତା ତଥା ବଳଙ୍ଗା ଥାନା ଅନ୍ତର୍ଗତ ଭାଣପୁର ଛକ ନିକଟରେ ଆଜି ରାସ୍ତା ପାଶ୍ୱର୍ରୁ ଧାନ ବିଲ ଭିତରେ ପଡିଥିବା ଜଣେ ଯୁବକର ମୃତଦେହକୁ ବଳଙ୍ଗା ପୁଲିସ ଜବତ କରିଛି । ମୃତ ଯୁବକ ଜଣକ ହେଲେ ନିମାପଡା ଥାନା ଅନ୍ତର୍ଗତ ରେଂଚ ପଂଚାୟତର ପୁରଷଣ୍ଡ ସାହାବାଜ ଗ୍ରାମର ଟୁକ ଭୋଇ (୪୦) । ଆଜି ସକାଳୁ ରାସ୍ତାରେ ଯାଉଥିବା କିଛି ଲୋକ ଧାନ ବିଲରେ ପଡିଥିବା ଟୁକର ମୃତଦେହ ଦେଖି ତାଙ୍କ ଗାଁକୁ ଖବର ଦେଇଥିଲେ । ଖବର ପାଇ ସାହାବାଜ ଗ୍ରାମର ଗ୍ରାମବାସୀ ମାନେ ଘଟଣା ସ୍ଥଳରେ ପଂହଚି ଅଜଣା ଗାଡି ଧକ୍କାରେ ଟୁକର ମୃତ ହୋଇଛି ସନେ୍ଦହ କରି ୧ଘନ୍ଟା କାଳ ରାସ୍ତା ରୋକ କରିଥିଲେ । ଫଳରେ ଉଭୟ ପାଶ୍ୱର୍ରେ ବହୁ ସଂଖ୍ୟାରେ ଯାନବାହନ ଅଟକି ରହିଥିଲା । ଖବର ପାଇ ବଳଙ୍ଗା ପୁଲିସ ଘଟଣା ସ୍ଥଲରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ରୋକ ହଟିଥିଲା । ମୃତ ଟୁକର ଶବକୁ ଜବତ କରି ବ୍ୟବଛେଦ ନିମନ୍ତେ ପୁରୀ ପଠାଇ ଘଟଣା ସ୍ଥଲରେ ପଡିଥିବା ଟୁକର ବାଇକ କୁ ଥାନାକୁ ଆଣୀଛି । ତେବେ ଟୁକ ଅଧିକ ମଦ୍ୟପାନ କରିଥିବା ହେତୁ ଭାରସାମ୍ୟ ହରାଇ ରାସ୍ତା ତଳକୁ ପଡି ତାର ମୃତ୍ୟୁ ହୋଇଥିବା ପୁଲିସ ଅନୁମାନ କରିଛି କାରଣ ଟୁକ ପାଟିରୁ ପ୍ରବଳ ମଦ ଗନ୍ଧ ହେଉଥିଲା । ୍ତେବେ ଶବବ୍ୟବଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣା ପଡିବ ବୋଲି ପୁଲିସ ପ୍ରକାଶ କରିଛି । ଏନେଇ ବଳଙ୍ଗା ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି ।
