କନ୍ଧମାଳ – ଆଜି କନ୍ଧମାଳ ଜିଲା ଟିକାବାଲି ଥାନା ଅଂଚଳର କାବଲାଗାଁ ନିକଟରେ ଗୋଟିଏ କାର୍ ଦୁର୍ଘଟଣାରେ ଜଣକର ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ଗୁରୁତର ଭାବେ ଆହତ ହୋଇଥିବା ଜଣାପଡିଛି । କାରଟି ଭାରସାମ୍ୟ ହରାଇ ଗୋଟିଏ ପୋଲରେ ପିଟିହେବା ଯୋଗୁଁ ଏହି ଦୁର୍ଘଟଣା ଘଟିଛି ।
ସୂଚନା ଅନୁସାରେ, ଆଜି ଅପରାହ୍ନ ପ୍ରାୟ ୩.୩୦ ମିନିଟ୍ ସମୟରେ ଏହି ଦୁର୍ଘଟଣା ଘଟିଥିଲା । ନୟାଗଡ ଅଂଚଳରୁ ଭଞ୍ଜନଗର ରାସ୍ତାରେ ଗୋଟିଏ ମାରୁତି କାର୍ ନଂ ଓଡି-୨୫ ବି-୧୯୧୯ ଯୋଗେ ଫୁଲବାଣୀ ଆସୁଥିବାବେ
ଳେ ରାସ୍ତାରେ ଡ୍ରାଇଭର ଭାରସାମ୍ୟ ହରାଇବାରୁ ଗାଡିରେ ବସିଥିବା ନାରୟଣ ସାତୁଆ(୩୮) ଓ ଡ୍ରାଇଭର କେ. ସୋମେଶ୍ୱର ରାଓ ଆଚାରୀ (୩୩) ଗୁରୁତର ଭାବେ ଆହତ ହୋଇଥିଲେ । ଖବର ପାଇ ଟିକାବାଲି ଟିମ୍ ହ୍ୟୁମାନିଟିର ସଦସ୍ୟ ହୀରୋ ନାୟକ ଏବଂ ନିଳମାଧବ ପୃଷ୍ଟି ଘଟଣାସ୍ଥଳରେ ପହଂଚି ଆହତ ମାନଙ୍କୁ ଉଦ୍ଧାର କରିବା ସହିତ ସେମାନଙ୍କୁ ନେଇ ଟିକାବାଲି ଡାକ୍ତରଖାନାରେ ଭର୍ତି କରାଇଥିଲେ । କିନ୍ତୁ, ସେଠାରେ ଡାକ୍ତର ନାରାୟଣଙ୍କୁ ମୃତ ଘୋଷଣା କରିଥିଲେ । ଗୁରୁତର ଥିବା ସୋମେଶ୍ୱରଙ୍କୁ ଫୁଲବାଣୀ ଜିଲା ମୁଖ୍ୟ ଚିକିତ୍ସାଳୟକୁ ରେଫର କରିଥିଲେ । ଫୁଲବାଣୀରେ ଟିମ ହ୍ୟୁମାନିଟିର ମାନ କୁମାର ପୃଷ୍ଟି ଜଗନ୍ନାଥ ରାଜୁ ପ୍ରମୁଖ ଓ ଅନ୍ୟମାନେ ପହଂଚି ଆହତଙ୍କୁ ସହାୟତା କରିଥିଲେ । ଟିକାବାଲି ଥାନା ପୋଲିସ ଘଟଣାସ୍ଥଳରୁ କାରଟିକୁ ଜବତ କରିବା ସହିତ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରି ତଦନ୍ତ ଚଳାଇଛି ।
