ଗଞ୍ଜାମ, ଶଳା ମାନଙ୍କ ଖଣ୍ଡା ଚୋଟରେ ଭିଣୋଇର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ଭାବେ ଆହତ ହୋଇଛନ୍ତି । ଗଞ୍ଜାମ ଜିଲ୍ଲା ଗୋଳନ୍ଥରା ଥାନା ଅନ୍ତର୍ଗତ ଗିରିଶୋଲା ଗ୍ରାମର ଆଡୁଆ ସାହିର ଡି. ଧରମା (୪୫)ଙ୍କ ଶଳା ମାନଙ୍କ ଖଣ୍ଡା ଚୋଟରେ ଗତକାଲି ରାତିରେ ମୃତ୍ୟୁ ଘଟିଛି । ଏତଦ୍ ବ୍ୟତୀତ ଧରମାଙ୍କ ଭାଇ ଜେଜେ ରାଓ ମଧ୍ୟ ଗୁରୁତର ଆହତ ହୋଇଛନ୍ତି । ପତ୍ନୀ ରାବଣା ଆମା ମଧ୍ୟ ଆହତ ହୋଇଛନ୍ତି । ରାବଣା ମ୍ମା ସେହି ଗ୍ରାମର ସାଇନିପେଟାରେ ରହୁଥିବା ତାଙ୍କ ମାଙ୍କୁ ଦେଖିବାକୁ ଯାଇଥିଲେ । ତାଙ୍କର ଦୁଇ ଭାଇ ଜି. ତ୍ରିପତି ଓ ଜି. ନାଗେଶ୍ୱର ଭଉଣୀକୁ ଗାଳି ଗୁଲଜ କରିବା ସହ ଘରୁ ଚାଲିଯିବାକୁ କଟୁ ଭାଷାରେ କହିଥିଲେ । ଏହାପରେ ରାବଣା ମ୍ମା ଏ ବାବଦରେ ସ୍ୱାମୀ ଧରମାଙ୍କୁ ଫୋନ୍ କରି ଜଣାଇଥିଲେ । ଏହା ଶୁଣିବା ପରେ ଧରମା ଓ ତାଙ୍କ ଭାଇ ଜେଜେ ରାଓ ତ୍ରିପତିଙ୍କ ଘରେ ପହଂଚିବା ପରେ ସେଠାରେ ପ୍ରବଳ ପାଟିତୁଣ୍ଡ ହୋଇଥିଲା । ଦୁଇ ଶଳା ତ୍ରିପତି ଓ ନାଗେଶ୍ୱର ଧାରୁଆ ଖଣ୍ଡା ସାହାଯ୍ୟରେ ଭିଣୋଇ ଧରମାଙ୍କ ଉପରେ ଆକ୍ରମଣ କରିଥିଲେ । ଭାଇକୁ ସୁରକ୍ଷା ଯୋଗାଇଦେବାକୁ ଉଦ୍ୟମ କରି ଜେଜେ ରାଓ ପତ୍ନୀ ରାବଣାମ୍ମା ମଧ୍ୟ ଆହତ ହୋଇଛନ୍ତି । ଗୋଳନ୍ଥରା ପୋଲିସ ଘଟଣାସ୍ଥଳରେ ପହଂଚି ତିନି ଜଣ ଆହତଙ୍କୁ ଚିକିତ୍ସା ନିମନ୍ତେ ବ୍ରହ୍ମପୁର ବଡ଼ ଡ଼ାକ୍ତରଖାନାକୁ ପଠାଇଥିଲା । ତେବେ ସେଠାରେ ଚିକିତ୍ସାଧିନ ଅବସ୍ଥାରେ ଗତକାଲି ରାତିରେ ଧରମାଙ୍କ ମୃତ୍ୟୁ ଘଟିଛି । ଘଟଣାରେ ପୋଲିସ ଆକ୍ରମଣକାରୀ ଦୁଇ ଜଣଙ୍କୁ ଗିରଫ କରି ଆଜି କୋର୍ଟଚାଲାଣ କରିଛି ।
