ତୃଟିପୂର୍ଣ୍ଣ ଅସ୍ତ୍ରୋପଚାର ଯୋଗୁଁ ଛାତ୍ରୀଙ୍କ ମୃତ୍ୟୁ, ଜିଲ୍ଲାପାଙ୍କ କାର୍ଯ୍ୟାଳୟ ସମ୍ମୁଖରେ ଶବ ରଖି ପରିବାର ଲୋକଙ୍କ ଧାରଣା 

ଘଟଣାରୁ ପ୍ରକାଶ ଯେ, ଭାମ୍ବେ କଲୋନୀରେ ରହୁଥିବୀ ସହଦେବ ନାଗଙ୍କ ୯ ବର୍ଷର ଝିଅ ସ୍ଥାନୀୟ କୁମୁଟି ଗୁଡା ପ୍ରାଥମିକ ସ୍କୁଲରେ ୩ୟ ଶ୍ରେଣୀରେ ପାଠ ପଢୁଥିବା ବେଳେ ୨ ବର୍ଷ ତଳେ ନିଆଁରେ ଡାହାଣ ହାତଟି ପୋଡି ଯାଇ ଆଙ୍ଗୁଠି ଗୁଡିକ ବଙ୍କା ହୋଇ ପାପୁଲିରେ ସଂଲଗ୍ନ ହୋଇଥିଲା । ବାପା ସହଦେବ ଭିନ୍ନକ୍ଷମ ପ୍ରମାଣ ପତ୍ର ପାଇବା ପାଇଁ ମାଲକାନଗିରି ସିଡିଏମଓଙ୍କ କାର୍ଯ୍ୟାଳୟକୁ ଯାଇଥିବା ବେଳେ ଝିଅ ଏଲିନାର ଡାହାଣ ହାତ ଅସ୍ତ୍ରୋପଚାର କଲେ ଠିକ ହୋଇଯିବ ବୋଲି ଡ଼ାକ୍ତର ପରାମର୍ଶ ଦେଇଥିଲେ । ଏହା ପରେ ସହଦେବ ମାଲକାନଗିରି ଜିଲ୍ଲାପାଳଙ୍କୁ ସାକ୍ଷାତ କରି ଆର୍ଥିକ ସହାୟତା ପାଇଁ ଦ୍ବାରସ୍ଥ ହୋଇଥିଲେ । ମାତ୍ର କଟକ ସରକାରୀ ହସପିଟାଲରେ ମାଗଣାରେ ହାତଟି ଅପରସନ ହୋଇପାରିବ ବୋଲି ନିର୍ଭରଯୋଗ୍ୟ ପ୍ରତିଶ୍ରୁତି ପାଇଲା ପରେ ଝିଅ ଏଲିନାକୁ ଧରି କଟକ ବଡ ମେଡିକଲକୁ ନେଇଥିଲେ । ଡାକ୍ତରଙ୍କ ପରାମର୍ଶ କ୍ରମେ ଗତ ମାର୍ଚ୍ଚ ମାସ ୧ ତାରିଖରେ ସହଦେବ ଅପରେସନ ପାଇଁ ଝିଅକୁ ଧରି କଟକ ଯାଇଥିଲେ । ଗତ ୮ ତାରିଖ ଦିନ ଏଲିନାର ହାତ ପାପୁଲିକୁ ଅପରେସନ କରାଯାଇଥିଲା । ଅପରସେନ ପରେ ବେଡକୁ ଅଣାଯାଇଥିଲା । ତେବେ ନିଶା ଇଞ୍ଜେକସନ ଦେଇ ଅପରେସନ କରାଯାଇଥିବା ବେଳେ ଝିଅଟିର ଚେତା ସକାଳ ସୁଦ୍ଧା ଫେରି ନଥିଲା । ଏବଂ ଝିଅ ଏଲିନାର ମୃତ୍ୟୁ ଘଟିଥଲା । ଆଜି ଏଲିନାର ଶବ ମାଲକାନଗିରି ପହଞ୍ଚିଲା ପରେ ସ୍ଥାନୀୟ କଲୋନୀରେ ଉତ୍ତେଜନା ଦେଖା ଦେଇଥିଲା । ଲୋକମାନେ ଏଲିନାର ଶବକୁ ଧରି ମାଲକାନଗିରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସି କ୍ଷତି ପୂରଣ ଦାବୀ କରିଥିଲେ । ଘଟଣାସ୍ଥଳରେ ମାଲକାନଗିରି ପୋଲିସ ଏବଂ ମାଲକାନଗିରି ତହସିଲଦାର ଗୁଣନିଧି ନାୟକ ଧାରଣାରେ ବସିଥିବା ଲୋକମାନଙ୍କୁ ବୁଝା ସୁଝା କରିଥିବା ବେଳେ ପୋଲିସ ଏ ସମ୍ପର୍କରେ ଏକ ମାମଲା ରୁଜୁ କରିବ ବୋଲି ପ୍ରକାଶ କରିଛି । ରେଡକ୍ରସ ପାଣ୍ଠିରୁ କିଛି ଅର୍ଥ ସହାୟତା କରାଯିବ ବୋଲି ଜିଲ୍ଲା ପ୍ରଶାସନ ପ୍ରତିଶ୍ରୁତି ଦେଇଛି । ତେବେ ଲୋକମାନେ ଜିଲ୍ଲାପାଙ୍କ କାର୍ଯ୍ୟାଳୟ ସମ୍ମୁଖରେ ଶବ ରଖି ଧାରଣାରେ ବସିଥିବା ଜଣାପଡିଛି ।