ଗଞ୍ଜାମ, ଭଞ୍ଜନଗର-ଫୁଲବାଣୀ ମୁଖ୍ୟ ରାସ୍ତାର ମୁଜାଗଡ଼ ଗ୍ରାମ ନିକଟରେ ଏକ ହାତୀ ଗତ ପ୍ରାୟ ସପ୍ତାହେ ହେବ ରାସ୍ତା ଉପରେ ଆସି ଚଲାବୁଲା କରୁଥିବାରୁ ଆଖପାଖ ଅଂଚଳର ଲୋକେ ଭୟଭିତ ହୋଇପଡିଛନ୍ତି । ସମୟେ ସମୟେ ହାତୀଟି ରାସ୍ତା ଉପରକୁ ଆସିଯିବା ଫଳରେ କିଛି ସମୟ ପାଇଁ ରାସ୍ତାର ଉଭୟ ପାଶ୍ୱର୍ରେ ଯାନବାହନ ଅଟକି ରହୁଛି । ହଠାତ୍ ହାତୀକୁ ଦେଖି ରାସ୍ତାରେ ଯାଉଥିବା ଗାଡି ଚାଳକ ଇତସ୍ତତଃ ହୋଇ ଦୁର୍ଘଟଣାର ସମ୍ମୁଖୀନ ହେଉଥିବା ଜଣାପଡିଛି । ସ୍ଥାନୀୟ ଜନସାଧାରଣଙ୍କ ପକ୍ଷରୁ ଏ ସମ୍ପର୍କରେ ଘୁମୁଷର ବନ ବିଭାଗ ଅଧିକାରୀଙ୍କୁ ଅବଗତ କରିଥିଲେ ମଧ୍ୟ ଏ ପର୍ଯ୍ୟନ୍ତ ହାତୀଙ୍କୁ ଜଙ୍ଗଲରୁ ଘଉଡାଇବା ପାଇଁ ବନ ବିଭାଗ ସକ୍ଷମ ହୋଇନଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତୁରନ୍ତ ବନ ବିଭାଗ ପକ୍ଷରୁ ହାତୀଟିକୁ ଜଙ୍ଗଲକୁ ଘଉଡାଇବା ପାଇଁ ବ୍ୟବସ୍ଥା କରିବାକୁ ଅଂଚଳବାସୀଙ୍କ ପକ୍ଷରୁ ଦାବି ହୋଇଛି ।
