ଜୟପୁର – ଜଣେ ଯୁବକ ଉନ୍ମତ ହୋଇ ଅନ୍ୟ ଜଣେ ଯୁବକକୁ କାଠ ଫଡ଼ାରେ ପ୍ରହାର କରି ହତ୍ୟା କରିଛି । ଏଭଳି ଘଟଣା ଘଟିଛି କୋରାପୁଟ ଜିଲ୍ଲା ବିସିଂହପୁର ଥାନା ଅଧିନରେ ଥିବା ଭୂମିଆଗୁଡ଼ା ଗ୍ରାମରେ । ଏହି ଗ୍ରାମର ୨୫ ବର୍ଷୀୟ ଯୁବକ ଭାରତ ନାୟକଙ୍କୁ ସେହି ଗ୍ରାମର ୨୭ ବର୍ଷୀୟ ଯୁବକ ଡମ୍ବରୁ ଭୂମିୟା ଗତକାଲି ରାତି ୧୨ଟା ସମୟରେ ଏକ କାଠ ଫଡ଼ାରେ ପ୍ରହାର କରି ହତ୍ୟା କରିଛି ଜଣାପଡ଼ିଛି । ପ୍ରଥମେ ଦୁଇ ଯୁବକଙ୍କ ମଧ୍ୟରେ କୌଣସି କାରଣରୁ ଗଣ୍ଡଗୋଳ ହୋଇଥିଲା । ଏହି ସମୟରେ ହଠାତ୍ ଡମ୍ବରୁ ରାଗିଯାଇ ଏକ କାଠ ଫଡ଼ାରେ ଭାରତକୁ ଆକ୍ରମଣ କରିଥିଲା । ଫଳରେ ଭାରତର ମୃତ୍ୟୁ ହୋଇଛି । ତେବେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡ଼ିନଥିବା ବେଳେ ସାଇଂଟିଫିକ୍ ଟିମକୁ ଡକାଇ ତଦନ୍ତ କରାଯାଉଛି ବୋଳି ବିସିଂହପୁର ଥାନା ଅଧିକାରୀ ଦାମୋଦର ବିହାରୀ କହିଛନ୍ତି । ମୃତକକ ପରିବାରେ ଶୋକାକୁଳ ପରିବେଶ ସୃଷ୍ଟି ହୋଇଥିବା ବେଳେ ପରିବାର ପକ୍ଷରୁ ଘଟଣାର ନିରପେକ୍ଷ ତଦନ୍ତ ଦାବି କରାଯାଇଛି ।
