ବାରିପଦା – ସୁନାରାମ ମାର୍ଣ୍ଡି ହତ୍ୟା ମାମଲାରେ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି ଝାରପୋଖରୀଆ ଥାନା ପୁଲିସ । ଗତ ଅକ୍ଟୋବର ୯ ଝାରପୋଖରୀଆ ଥାନା ଯୋକା-କପାଡ଼ିହା ରାସ୍ତା ମଝିରେ ଉକ୍ତ ଥାନା ଅନ୍ତର୍ଗତ ଜଟିଆଶୋଳ ଗ୍ରାମର ସୁନାରାମ ମାର୍ଣ୍ଡିଙ୍କ ମୃତଦେହକୁ ପୁଲିସ ଉଦ୍ଧାର କରିଥିଲା । ଝାରପୋଖରୀଆ ଥାନା ପୁଲିସ ଓ ବାରିପଦାରୁ ସାଇଂଟିଫିକ୍ ଟିମ୍ ଘଟଣାସ୍ଥଳରେ ପହଁଚି ତଦନ୍ତ ଆରମ୍ଭ କରିଥିବା ସମୟରେ ଅଭିଯୁକ୍ତମାନେ ଛାଡ଼ିଦେଇଯାଇଥିବା କେତେକ ସୁରାକ୍ ପୁଲିସର ହସ୍ତଗତ ହେବା ପରେ ତଦନ୍ତ ପ୍ରକ୍ରିୟାକୁ ଅଧିକ ସରଳ କରିଦେଇଥିଲା । ଆଜି ଉକ୍ତ ସୁନାରାମ ମାର୍ଣ୍ଡି ହତ୍ୟା ମାମଲାରେ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି । ଏଥି ସହିତ ପୁଲିସ ସେମାନଙ୍କ ନିକଟରୁ ହତ୍ୟାକାଣ୍ଡରେ ବ୍ୟବହୃତ ଅସ୍ତ୍ରକୁ ମଧ୍ୟ ଜବତ କରିଛି । ଅଭିଯୁକ୍ତ ଲାଲ ମୋହନ ଓ ବାଘେଲା ଉକ୍ତ ଦିନ ସୁନାରାମଙ୍କୁ ଅତ୍ୟଧିକ ମଦ ପିଆଇଥିଲେ ଏବଂ ନିଶାଗ୍ରସ୍ତ ଅବସ୍ଥାରେ ତାକୁ ହତ୍ୟା କରିବା ପରେ ମଝିରାସ୍ତାରେ ଫିଙ୍ଗିଦେଇଥିଲେ । ପୂର୍ବ ଶତ୍ରୁତା କାରଣରୁ ସେମାନେ ପ୍ରତିଶୋଧ ପରାୟଣ ହୋଇ ସୁନାରାମକୁ ହତ୍ୟା କରିଥିଲେ ବୋଲି ଅଭିଯୁକ୍ତ ଦୁଇ ଜଣ ପୁଲିସ ନିକଟରେ ସ୍ୱୀକାର କରିଥିବାର ଜଣାପଡ଼ିଛି ।
