ଜୟପୁର – ଏକ ବଡ ଧରଣର ଡକାୟତି ଯୋଜନାକୁ ପଣ୍ଡ କରିଛି କୋଟପାଡ ପୋଲିସ । ୬ ଜଣ ଦୁର୍ବୃତ ଡ଼କାୟତି ଯୋଜନା କରୁଥିବା ବେଳେ ପୋଲିସ ଖବର ପାଇ ଚଢ଼ଉ କରି ଏମାନଙ୍କୁ ଠାବ କରିଥିଲା । ଘଟଣାରେ ପୋଲିସ ୫ ଜଣଙ୍କୁ ଗିରଫ କରିଛି । ଗତକାଲି ରାତ୍ର ପ୍ରାୟ ୨ ଟା ସମୟରେ ଶଶାହାଣ୍ଡି ଗ୍ରାମର ୬ ନମ୍ବର ଗ୍ରାମ ଦେଇ ଯାଇଥିବା ଜାତୀୟ ରାଜପଥରେ ବଡ ଧରଣର ଡ଼କାୟତି ଯୋଜନା କରୁଥିବା ବେଳେ ପୋଲିସ ଏହାକୁ ପଣ୍ଡ କରିଛି । ଅଭିଯୁକ୍ତ ମାନଙ୍କ ନିକଟରୁ ପୋଲିସ ଏକ ବୋଲେରୋ ଗାଡି ଏବଂ ଡ଼କାୟତିରେ ବ୍ୟବହୃତ ଲଙ୍କାଗୁଣ୍ଡ, ଛୁରି, ଭୁଜାଲି, ଲୁହା ରଡ, ଠେଙ୍ଗା, କଳା ମୁଖା, ମାରଣାସ୍ତ୍ର ଆଦି ଜବତ କରିଛି । ପୋଲିସ ୫ ଜଣଙ୍କୁ ଗିରଫ କରିବାରେ ସଫଳ ହୋଇଥିବା ବେଳେ ଅନ୍ୟ ଜଣେ ଘଟଣାସ୍ଥଳରୁ ଫେରାର୍ ହୋଇଯାଇଥିଲା । ଗିରଫ ୫ ଜଣଙ୍କୁ କୋର୍ଟ ଚାଲାଣ କରାଯାଇଥିବା ବିଷୟ ଏସଡିପିଓ ହରେକୃଷ୍ଣ ମାଝି ପ୍ରକାଶ କରିଛନ୍ତି । ଗିରଫ ଅପରାଧୀଙ୍କ ନାମରେ ପୂର୍ବରୁ ବହୁ ଅପରାଧିକ ମାମଲା ରହିଥିବା ପୋଲିସ ସୂଚନା ଦେଇଛି ।
