ସଦର ଥାନା ଅନ୍ତର୍ଗତ ମସିହାଖାଲି ବାଉରୀ ସାହିର କୈଳାସ ଦାସ ତାଙ୍କ ବୃଦ୍ଧ ମାଙ୍କ ସହିତ ରହୁଥିଲେ ଏବଂ ମିସ୍ତ୍ରୀ ଭାବେ କାର୍ଯ୍ୟ କରି ଆସୁଥିଲେ । ଜିରୋ ନାଇଟ୍ ଅବସରରେ କୈଳାସ ଭୋଜି କରିବା ପାଇଁ ତାଙ୍କ ସାଙ୍ଗ ଘରକୁ ଯାଇଥିଲେ । ହେଲେ ବିଳମ୍ବିତ ରାତି ପର୍ଯ୍ୟନ୍ତ ସେ ଫେରିନଥିଲେ । ସକାଳେ କିଛି ଲୋକ ଗାଁମୁଣ୍ଡ ବଡବନ୍ଧକୁ ଶୌଚ ପାଇଁ ଯାଇଥିବା ବେଳେ ସେଠାରେ ଥିବା ହନୁମାନ ମୂର୍ତି ନିକଟରେ କୈଳାସ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡିଥିବା ଦେଖିବାକୁ ପାଇଥିଲେ । ତାଙ୍କ ମୁଣ୍ଡ ଓ ମୁହଁର ବିଭିନ୍ନ ସ୍ଥାନରେ ଗଭୀର କ୍ଷତ ଚିହ୍ନ ରହିଥିଲା । କୌଣସି ଧାରୁଆ ଅସ୍ତ୍ର ଦ୍ୱାରା ତାଙ୍କୁ ହଣା ଯାଇଥିବା ପୋଲିସ ସନ୍ଦେହ କରୁଛି । କୈଳାସଙ୍କ ଏଭଳି ଅବସ୍ଥା ଦେଖି ଗାଁ ଲୋକେ ବୃଦ୍ଧା ମାଙ୍କୁ ଖବର ଦେଇଥିଲେ । ତୁରନ୍ତ ୧୦୮ ଆମ୍ବୁଲାନ୍ସ ଯୋଗେ କୈଳାସଙ୍କୁ ଉଦ୍ଧାର କରାଯାଇ ବ୍ରହ୍ମପୁର ବଡ ଡ଼ାକ୍ତରଖାନାରେ ଭର୍ତି କରାଯାଇଥିଲା । ତେବେ ସେଠାରେ ଚିକିତ୍ସାଧିନ ଅବସ୍ଥାରେ ଗତକାଲି ସଂନ୍ଧ୍ୟାରେ ତାଙ୍କର ମୃତ୍ୟୁ ଘଟିଛି । ସଦର ଥାନା ପୋଲିସ ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇବା ସହ ଏ ସଂକ୍ରାନ୍ତରେ ଏକ ହତ୍ୟା ମାମଲା ରୁଜ୍ଜୁ କରି ଘଟଣାର ତଦନ୍ତ ଆରମ୍ଭ କରିଛି ।
