ଜଟଣୀ – ଖୋର୍ଦ୍ଧାରୋଡ-ପୁରୀ ରେଳପଥର ଅରାଗଡ ସ୍ଥିତ ଏକ ଛୋଟ ବ୍ରିଜ ନିକଟରେ ବୁଧବାର ବିଳମ୍ବିତ ରାତିରେ ଜଣେ ବ୍ୟକ୍ତି ବାଇକ୍ ନେଇ ରେଳ ଧାରଣା ଅତିକ୍ରମ କରୁଥିବା ଅବସ୍ଥାରେ ଦ୍ରୁତ ଗତିରେ ଆସୁଥିବା ଏକ୍ସପ୍ରେସ୍ ଟ୍ରେନକୁ ଦେଖି ବାଇକ୍ ଛାଡି ଡେଇଁ ପଳାଇଥିବା ବେଳେ ବାଇକକୁ ମାଡିଯାଇଥିଲା ଟ୍ରେନଟି । ଫଳରେ ଅଳ୍ପକେ ବର୍ତିଯାଇଥିଲେ ବାଇକ୍ ଚାଳକ । ଏ ନେଇ ଆଜି ଖୋର୍ଦ୍ଧାରୋଡ ଆରପିଏଫ୍ ସମ୍ପୃକ୍ତ ବାଇକ ଚାଳକକୁ ଗିରଫ କରି କୋର୍ଟ ଚାଲାଣ କରିଛି ।
ସୂଚନାନୁସାରେ, ଖୋର୍ଦ୍ଧାରୋଡ- ପୁରୀ ରେଳପଥର ହରିପୁର ଷ୍ଟେସନ ନିକଟ ଅରାଗଡ ଛୋଟ ବ୍ରିଜ ଉପର ରେଳ ଧାରଣାରେ ପୁରୀ ଜିଲ୍ଲା ଡେଲାଙ୍ଗ ଥାନା ଅନ୍ତର୍ଗତ ବସନ୍ତପୁର ଗ୍ରାମର ନବଘନ ସାହୁ ବୁଧବାର ରାତ୍ର ସାଢେ ୧୧ଟା ବେଳେ ଜଟଣୀରୁ ଦୋକାନ ବନ୍ଦ କରି ଏକ କାଲିବର ବାଇକ୍ ମୋଟରସାଇକେଲ ଯୋଗେ ଏହି ବାଟ ଦେଇ ଘରକୁ ଯାଉଥିଲେ । ମାତ୍ର ଏହି ସମୟରେ ପୁରୀ-ହାୱଡା ଜଗନ୍ନାଥ ଏକ୍ସପ୍ରେସ ଦ୍ରୁତ ଗତିରେ ଆସିଥିଲା । ଏହାକୁ ଦେଖି ବାଇକ୍ ଚାଳକ ନବଘନ ବାଇକଟିକୁ ଛାଡି ଡେଇଁ ପଡିଥିଲେ । ବାଇକ୍ ଚାଳକଙ୍କ ଜୀବନ ବଂଚି ଯାଇଥିବା ବେଳେ ବାଇକଟି ଉପରେ ଟ୍ରେନଟି ଚଢିଯାଇଥିଲା । ଫଳରେ ବାଇକଟି ଭାଂଗିଯିବା ସହିତ ଟ୍ରେନର ସମ୍ମୁଖ ଭାଗଟି ଭାଂଗିରୁଜି ଯାଇଥିଲା । ସେଠାରେ ଉପସ୍ଥିତ ଥିବା ଲୋକଙ୍କ ସହାୟତାରେ ନବଘନ ଦୁର୍ଘଟଣାଗ୍ରସ୍ତ ବାଇକଟିକୁ ନିକଟସ୍ଥ ଏକ ଜଙ୍ଗଲରେ ରଖି ପଳାଇଥିଲେ । ଘଟଣା ସମ୍ପର୍କରେ କେହି ଜଣେ ବ୍ୟକ୍ତି ଖୋର୍ଦ୍ଧାରୋଡ ଆରପିଏଫକୁ ଜଣାଇଥିଲେ । ତେବେ ଏ ନେଇ ଆଜି ଖୋର୍ଦ୍ଧାରୋଡ ଆରପିଏଫ୍ ଟିମ୍ ଘଟଣାସ୍ଥଳରେ ପହଁଚି ବାଇକଟିକୁ ଜବତ କରିବା ସହ ଚାଳକ ନବଘନକୁ ଗିରଫ କରି କୋର୍ଟ ଚାଲାଣ କରିଛି ।
