ବସରେ   ଗଞ୍ଜେଇ ଚାଲାଣ ବେଳେ କରଞ୍ଜିଆ ପୋଲିସ ଦ୍ୱାରା ଜବତ ।

ବାରିପଦା-ଡିସେମ୍ବର ୨୫ ବିଳମ୍ବିତ ରାତିରେ ଏକ  ଯାତ୍ରୀବାହୀ ଘରୋଇ ବସରେ ଗଞ୍ଜେଇ ଚୋରାରେ ଚାଲାଣ ଉଦ୍ୟମ ବେଳେ କରଞ୍ଜିଆ ପୋଲିସ ପକ୍ଷରୁ ଜବତ  କରାଯାଇଛି ।ଏପରି ଘଟଣା ସାମ୍ନାକୁ ଆସିଛି ମୟୁରଭଞ୍ଜ ଜିଲ୍ଲା  କରଞ୍ଜିଆ ଥାନା  ଅଞ୍ଚଳରୁ । ଗତକାଲି ବିଳମ୍ବିତ ରାତିରେ ୪୯ ନମ୍ବର ଜାତୀୟ ରାଜପଥରେ କେନ୍ଦୁଝରରୁ କୋଲକାତା ଯାଉଥିବା ଡ଼ଲଫିନ ନାମକ ଏକ ଯାତ୍ରୀବାହୀ ଘରୋଇ ବସରେ ଗଞ୍ଜେଇ ଚାଲାଣ ହେଉଥିବା ଖବର ପାଇ କରଞ୍ଜିଆ ପୋଲିସ ରାସ୍ତାରେ ବସକୁ ଅଟକାଇ ତଲାସୀ ନେଇଥିଲେ । ଏହି ସମୟରେ ବସରେ  ୭ଟି ବଡ଼ ପ୍ଲାଷ୍ଟିକ ପ୍ୟାକେଟରେ ୩୫ କେଜି ଗଞ୍ଜେଇ ବାହାରିଥିଲା । ଯାହାର ମୁଲ୍ୟ ଲକ୍ଷାଧିକ ଟଙ୍କା ହବ ବୋଲି ଅନୁମାନ କରିଛି ପୋଲିସ । ଚୋରା ଚାଲାଣ ହେଉଥିବା ଖବର ପାଇ କରଞ୍ଜିଆ ପୋଲିସ ଗାଡି ସହିତ ଗାଡିର ହେଲ୍ପର ଏବଂ କଣ୍ଡକ୍ଟରକୁ ଅଟକ ରଖିଥିଲା  । ତେବେ ଉକ୍ତ ଗାଡ଼ିରେ  ୪୬ଜଣ ଯାତ୍ରୀ ଥିବାରୁ ଗାଡିକୁ କିଛି ସମୟ ଅଟକ ରଖି ଛାଡି ଦିଆଯାଇଥିଲା । ତେବେ ଯାତ୍ରୀମାନଙ୍କୁ କୋଲକାତାରେ ଛାଡି ଫେରିବା ସମୟରେ ବସକୁ ପୁଣି ଜବତ କରିଛି କରଞ୍ଜିଆ ପୋଲିସ । ଦିନକୁ ଦିନ ଏପରି ଚୋରାନିଶା ବେପାରୀ ମାନେ ସକ୍ରିୟ ରହି ବିଭିନ୍ନ ଉପାୟରେ ନିଶା କାରବାର କରୁଥିବାରୁ ପୋଲିସ ପାଇଁ ମୁଣ୍ଡ ବଥାର କାରଣ ପାଲଟିଛି ।