ଅନ୍ୟପକ୍ଷରେ ସେ କହିଛନ୍ତି ଯେ, ମୋର ୨୨ ବର୍ଷର ପୋଲିସ ଚାକିରୀରେ ଏହା ଏକ ବିଭତ୍ସ ଘଟଣା । ନାବାଳିକାର ଘର ଠାରୁ ଅଭିଯୁକ୍ତ ସରୋଜର ଘର ପ୍ରାୟ ୨୦୦ ମିଟର । ଏପରିକି ସରୋଜର ସାନ ଭଉଣୀ ସହିତ ନାବାଳିକା ପରୀର ଭଲ ସମ୍ପର୍କ ଥିଲା । ଅନେକ ସମୟରେ ସରୋଜର ଘରେ ଥିବା ଜାମୁ କୋଳି ଗଛରୁ କୋଳି ଖାଇବାକୁ ପିଲାମାନେ ସେଠାକୁ ଯାଇଥାନ୍ତି । ୧୪ ତାରିଖ ଦିନ ନାବାଳିକା ଜଣକ ଏକାକୀ ଜାମୁକୋଳି ଖାଇବାକୁ ସେଠାକୁ ଯାଇଥିଲେ । ସରୋଜର ବାପା ନାହିଁ, ମାଆ ମଧ୍ୟ ଚାକିରୀ କରୁଛି, ବଡ଼ ଭଉଣୀ ବାହା ହୋଇ ସାରିଛି । ସାନ ଭଉଣୀ ମଧ୍ୟ ଚାକିରୀ କରୁଛି । ଘଟଣା ଦିନ ଘରେ କେହି ନଥିଲେ । ଘଟଣା ଦିନ ସରୋଜ ଘରେ ଏକାକୀ ଥିଲା । ଏହି ସମୟରେ ଝିଅ କୋଳି ଖାଇବାକୁ ସେଠାକୁ ଯାଇଥିଲା । ସରୋଜ ପ୍ରଥମେ ତାକୁ ଭୁଲାଇ ଘର ଭିତରକୁ ଡାକି ନେଇଥିଲା । ଏହାପରେ ତା ସହ ଦୁଷ୍କର୍ମ ଉଦ୍ୟମ କରିଥିଲା । ନାବାଳିକା ଏଥିରେ ବାଧା ଦେବାରୁ ଅଭିଯୁକ୍ତ ସରୋଜ ତାର ତଂଟି ଚିପି ହତ୍ୟା କରିଥିଲା । ଏପରିକି ମୃତ୍ୟୁ ପରେ ନାବାଳିକାର ମୃତଦେହ ସାଥିରେ ଦୁଷ୍କର୍ମ କରିଥିଲା । ନାବାଳିକାର ମୃତଦେହ ସହ ଦୁଷ୍କର୍ମ ପରେ ସେ ତାର ଶବକୁ ଏକ ଛୋଟ ବସ୍ତାରେ ପୁରାଇଥିଲା । ବସ୍ତାରେ ମୃତଦେହ ଓ ସେ ପିନ୍ଧିଥିବା ଡ଼୍ରେସ୍ କୁ ପୁରାଇ ପୋଖରୀ କଡ଼ରେ ଫିଙ୍ଗି ଦେଇଥିଲା ଏବଂ ଏହା ଉପରେ ଡାଳପତ୍ର ଘୋଡାଇ ଦେଇଥିଲା । ତେବେ କୁନି ଝିଅଟି ପିନ୍ଧିଥିବା ଲେଗିଙ୍ଗସ୍ କୁ ନେବାକୁ ସେ ଭୁଲି ଯାଇଥିଲା । ପରେ ଲେଗିଙ୍ଗସ୍ କୁ ନେଇ ସେ ପୋଖରୀରେ ଫିଙ୍ଗି ଦେଇଥିବା ପଚରା ଉଚୁରା ବେଳେ ସ୍ୱୀକାର କରିଥିବା ନେଇ ଏସଆଇଟି ମୁଖ୍ୟ ବୋଥ୍ରା ସୂଚନା ଦେଇଛନ୍ତି । ଏହି ଲେଗିଙ୍ଗସ୍ କୁ ଉଦ୍ଧାର ପାଇଁ ପୋଖରୀ ଶୁଖାଯାଉଥିବା ସେ କହିଛନ୍ତି ।
