ଚିକିତ୍ସା ଅବହେଳାରୁ ବିଚାରଧୀନ କଏଦୀର ମୃତ୍ୟୁ ଅଭିଯୋଗ, ମାନବ ଅଧିକାର କିମଶନଙ୍କ ଦ୍ୱାରସ୍ଥ ହେଲେ ଗାଁ ଲୋକ

୨୦୧୭ ମସିହାରେ ମାଲକାନଗିରି ଜିଲ୍ଲା ମାଥିଲି ଥାନା ପୋଲିସ ଯନ୍ଦ୍ରାଗୁଡା ଗ୍ରାମର ବାମନ କୁଞ୍ଜାମିଙ୍କୁ ଘରୁ ଉଠାଇ ଆଣି ନକ୍ସଲ କେସରେ ଜେଲ ପଠାଇଥିଲା । ହେଲେ ଗତ ତିନି ବର୍ଷ ଧରି ତାଙ୍କୁ କୋର୍ଟରୁ ଜାମିନ୍ ମିଳିଲା ନାହିଁ । ଗରିବ ଆଦିବାସୀ ପରିବାର ଲୋକେ ବଡ ଓକିଲ ମଧ୍ୟ ଧରି ପାରିଲେ ନାହିଁ । ଫଳରେ ଜେଲରେ ରହି ଜାମିନ୍ ଅପେକ୍ଷାରେ ଶେଷରେ ଆର ପାରିକୁ ଚାଲି ଗଲେ ବାମନ କୁଞ୍ଜାମି । ଗତ କିଛି ମାସ ଧରି ତାଙ୍କର ଦେହ ଖରାପ ଥିଲା, ହେଲେ ଏ ସଂପର୍କରେ ପରିବାର ଲୋକଙ୍କୁ ଜେଲ୍ ପ୍ରଶାସନ କିଛି ଜଣାଇ ନଥିବା ଅଭିଯୋଗ ହୋଇଛି । ଏମିତି କି ବାବନ ଅବସ୍ଥା ଗୁରୁତର ହେବା ପରେ ତାଙ୍କୁ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଯେଉଁଠି ଗତ ୧୮ ତାରିଖ ଦିନ ତାଙ୍କର ମୃତ୍ୟୁ ହୋଇଛି । ହେଲେ ଜୀବିତ ଅବସ୍ଥାରେ ପରିବାର ଲୋକଙ୍କୁ କିଛି ଅବଗତ କରାଯାଇନଥିବା ବେଳେ ମୃତ୍ୟୁ ପରେ ପରିବାର ଲୋକଙ୍କୁ ଖବର ଦିଆଯାଇଛି ଶବ ନେବା ଲାଗି । ଜଣେ ବିଚାରାଧିନ କଏଦୀଙ୍କ ଅଚାନକ ମୃତ୍ୟୁକୁ ନେଇ ଏବେ ସବୁ ମହଲରେ ପ୍ରଶ୍ନ ଉଠିଛି । ନକ୍ସଲ କେସରେ ପୋଲିସ ଜେଲକୁ ପଠାଇଥିବା ବାମନ କୁଞ୍ଜାମିଙ୍କ ଚିକିତ୍ସା ଅବହେଳା ଯୋଗୁଁ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଏମିତିକି ବାମନ କୁଞ୍ଜାମିଙ୍କ ମୃତ୍ୟୁ ପାଇଁ ଜିଲ୍ଲା ପ୍ରଶାସନକୁ ଦାୟୀ କରିଛନ୍ତି ପରିବାର ଲୋକେ । ତେବେ ଏହାକୁ ନେଇ ଆମେ ଜିଲ୍ଲା ମୁଖ୍ୟ ଚିକିତ୍ସଳୟର ସୁପରିଟେଣ୍ଡେଣ୍ଟ ଏ.କେ. ଭୋଳଙ୍କୁ ପଚାରିବାରୁ ସେ କହିଥିଲେ ଯେ, ଦିର୍ଘ ଦିନ ଧରି ମଧୁମେହ ରୋଗରେ ପୀଡିତ ଥିବା ବାବନ କୁଞ୍ଜାମିଙ୍କ କିଡିନି ଖରାପ ହେବା ଯୋଗୁଁ ତାଙ୍କର ମୃତ୍ୟୁ ହୋଇଛି । ଯାହାକି ଶବ ବ୍ୟବଚ୍ଛେଦ କରିବା ପରେ ଡାକ୍ତରୀ ଟିମ୍ ଜାଣି ପାରିଛନ୍ତି । ତେବେ ଦିର୍ଘ ଦିନ ଧରି ରୋଗରେ ପୀଡିତ ଥିବା ଜଣେ କଏଦୀଙ୍କ ଉଚିତ୍ ଚିକିତ୍ସା କରାଗଲା ନାହିଁ କାହିଁକି ଓ ପରିବାର ଲୋକଙ୍କୁ ପୂର୍ବରୁ ଏହି ସୂଚନା କେମିତି ଦିଆ ଯାଇନଥିଲା ତାହାକୁ ନେଇ ମାନବ ଅଧିକାର କମିଶନଙ୍କୁ ପତ୍ର ଲେଖିଛନ୍ତି ଗାଁ ଲୋକେ ।