ବାରିପଦା – ମୟୁରଭଞ୍ଜ ଜିଲ୍ଲା ଝାରପୋଖରିଆ ଥାନା ଯୋକା-କପାଡ଼ିହା ରାସ୍ତାମଝିରେ ଜଣେ ବ୍ୟକ୍ତିର ରକ୍ତାକ୍ତ ମୃତ ଦେହ ଉଦ୍ଧାର ହୋଇଛି । ମୃତକ ଜଣଙ୍କ ହେଲେ ସେହି ଥାନା ଅନ୍ତର୍ଗତ ଜାଟିଆଷୋଳ ଗ୍ରାମର ସୁନାରାମ ମାର୍ଣ୍ଡି ।କେହି ଦୁର୍ବୃତ ତାଙ୍କର ଗଳା କାଟି ହତ୍ୟା କରିଥିବା ଅନୁମାନ କରାଯାଉଛି ।
ସୂଚନା ଅନୁଯାୟୀ ସୁନାରାମ ଗତକାଲି ରାତିରେ ଯୋକାରେ ହେଉଥିବା ରାବଣପୋଡି ଦେଖିବାକୁ ଯାଇ ଘରକୁ ଫେରିନଥିଲେ । ଆଜି ସକାଳୁ ସୁନାରାମଙ୍କ ରକ୍ତାକ୍ତ ମୃତଦେହ ରାସ୍ତାଉପରେ ପଡିଥିବା ଦେଖିବାକୁ ମିଳିଥିଲା । ପାରିପାର୍ଶ୍ୱିକ ଅବସ୍ଥାକୁ ଅନୁଧ୍ୟାନ କଲେ କେହି ଦୁର୍ବୁତ ସୁନାରାମକୁ ଗଳା କାଟିବା ପରେ ପଥରରେ ଛେଚି ହତ୍ୟାକରିଥିବା ଅନୁମାନ କରାଯାଉଛି । ଖବର ପାଇ ଘଟଣା ସ୍ଥଳରେ ଝାରପୋଖରିଆ ପୋଲିସ ପହଂଚି ମୃତଦେହ ଜବତ କରିଥିବା ସହ ବାରିପଦାରୁ ସାଇଂଟିଫିକ ଟିମ ଡକାଇ ତଦନ୍ତ ଆରମ୍ଭ କରିଛି । ହତ୍ୟାକାଣ୍ଡର କାରଣ ଜଣାପଡିନଥିବା ବେଳେ ସୁନାରାମଙ୍କ ପରିବାର ପକ୍ଷରୁ ହତ୍ୟାକାରୀକୁ ତୁରନ୍ତ ଖୋଜି ବାହାର କରି କଠୋର ଦଣ୍ଡବିଧାନ ନିମନ୍ତେ ଦାବି କରିଛନ୍ତି ।
