ଭୁବନେଶ୍ୱର – ଇତିହାସ ରବିବ ଭାରତ । ଏଥିପାଇଁ ଆରମ୍ଭ ହୋଇଯାଇଛି କାଉଂଟଡାଉନ୍ । ଆଜି ବିଳମ୍ବିତ ରାତିରେ ଚନ୍ଦ୍ରଯାନ-୨ ଚନ୍ଦ୍ରର ଦକ୍ଷିଣ ମେରୁରେ ଅବତରଣ କରିବ । “ଲାଣ୍ଡର ବିକ୍ରମ ସେପ୍ଟେମ୍ବର ୭ ରେ ୧ ରୁ ୨ଟା ମଧ୍ୟରେ ଅବତରଣ ମୁଖୀ ହେବ ଏବଂ ପରେ ୧.୩୦ରୁ ୨.୩୦ ମଧ୍ୟରେ ଅବତରଣ କରିବ” ବୋଲି ଇସ୍ରୋ ସୂଚନା ପ୍ରଦାନ କରିଛି ।
ବେଙ୍ଗାଲୁରୁସ୍ଥିତ ଇସ୍ରୋ ମୁଖ୍ୟାଳୟଠାରେ ଚନ୍ଦ୍ରର ଦକ୍ଷିଣ ମେରୁରେ ଚନ୍ଦ୍ରଯାନ-୨ର ଅନ୍ତିମ ଅବତରଣ ଦୃଶ୍ୟକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦେଖିବେ । ଏହି ଅବସରରେ ସେ ମହାକାଶ ବିଜ୍ଞାନ ସମ୍ପର୍କିତ ସାଧାରଣ ଜ୍ଞାନ ପ୍ରତିଯୋଗିତାରେ ବିଜୟୀ ଛାତ୍ରଛାତ୍ରୀଙ୍କ ସହ ମତ ବିନିମୟ କରିବେ ।
ଏନେଇ ପ୍ରଧାନମନ୍ତ୍ରୀ ମୋଦୀ ଟ୍ୱିଟ୍ କରି କହିଛନ୍ତି ଯେ ୧୩୦ କୋଟି ଭାରତୀୟ ଏହା ପାଇଁ ଅପେକ୍ଷା କରିଛନ୍ତି । ଭାରତୀୟ ଅନ୍ତରୀକ୍ଷ ବୈଜ୍ଞାନିକ ମାନଙ୍କର ଅନୁକରଣୀୟ କୌଶଳକୁ ଭାରତ ଓ ସମଗ୍ର ବିଶ୍ୱ ପୁଣି ଦେଖିବ ବୋଲି ସେ କହିଛନ୍ତି ।
ବିଜ୍ଞାନ ଓ ଏହାର ସଫଳତା ପ୍ରତି ଅତ୍ୟନ୍ତ ରୁଚି ରଖୁଥିବା ଜଣେ ପ୍ରଧାନମନ୍ତ୍ରୀ ଭାବେ ଶ୍ରୀ ନରେନ୍ଦ୍ର ମୋଦୀଙ୍କର ଏହି ଇସ୍ରୋ ଗସ୍ତ ଭାରତୀୟ ମହାକାଶ ବିଜ୍ଞାନୀମାନଙ୍କ ମନୋବଳ ବୃଦ୍ଧି କରିବ ଏବଂ ଯୁବ ବୈଜ୍ଞାନିକମାନଙ୍କୁ ନୂତନ ଉଦ୍ଭାବନ ଦିଗରେ ଚେଷ୍ଟା କରିବା ପାଇଁ ପ୍ରେରିତ କରିବ ।
ଚନ୍ଦ୍ରଯାନ-୨ ମିସନ ପ୍ରତି ବ୍ୟକ୍ତିଗତ ରୁଚି ରଖୁଥିବା ଶ୍ରୀ ମୋଦୀ ଏହି ମିସନକୁ ଇଣ୍ଡିଆ ଆଟ୍ ହାର୍ଟ , ଇଣ୍ଡିଆନ୍ ଇନ୍ ସ୍ପିରିଟ୍ ! ବୋଲି ଅଭିହିତ କରିଛନ୍ତି ଏବଂ ସମ୍ପୂର୍ଣ୍ଣ ଭାରତୀୟ ଜ୍ଞାନ କୌଶଳରେ ନିର୍ମିତ ଏହି ଅଭିଯାନ ପ୍ରତ୍ୟେକ ଭାରତୀୟଙ୍କ ପାଇଁ ଗର୍ବର ବିଷୟ ବୋଲି କହିଛନ୍ତି ।
