ହରିଚନ୍ଦନପୁର – କେନ୍ଦୁଝର ଜିଲ୍ଲା ହରିଚନ୍ଦନପୁର ଅଞ୍ଚଳର ବିଭିନ୍ନ ପୂଜା ମଣ୍ଡପରେ ମା ଜଗତଜନନୀ ଦୁର୍ଗାଙ୍କ ଶାରଦୀୟ ଦଶହରା ପୂଜା ଓ ବିଜୟା ଦଶମୀ ପାଳିତ ହୋଇଯାଇଛି । ମା’ଙ୍କ ନୀତିରିତି ଅନୁଯାୟୀ ପୂଜାର୍ଚ୍ଚନା କରାଯାଇଥିବା ସହ କୋଭିଡ୍ କଟକଣା ନେଇ ସ୍ୱଳ୍ପ ସଂଖ୍ୟକ ଭକ୍ତଙ୍କୁ ନେଇ ଏହି ପୂଜା ବିଭିନ୍ନ ପୂଜା ମଣ୍ଡପରେ ଅନୁଷ୍ଠିତ ହୋଇଯାଇଛି । ଖବର ଅନୁଯାୟୀ ହରିଚନ୍ଦନପୁର, ବ୍ରାହ୍ମଣୀପାଳ, ମନୋହରପୁର ଭଳି ବିଭିନ୍ନ ସ୍ଥାନରେ ଆଜି ମା’ଙ୍କ ଦଶହରା ପୂଜା ଅନୁଷ୍ଠିତ ହୋଇଯାଇଛି । ଏହି ଅବସରରେ ଆଜି ହରିଚନ୍ଦନପୁର ସାର୍ବଜନୀନ ଦୁର୍ଗାପୂଜା ମଣ୍ଡପରେ ପ୍ରାୟତଃ ୨୫ରୁ ୩୦ଟି ବିଭିନ୍ନ ଗାଡ଼ି ପୂଜା ହୋଇଥିବା ସହ ବିଭିନ୍ନ ଦୋକାନ ଗୁଡିକ ପୂଜା ହୋଇଥିଲା । ପ୍ରତ୍ୟେକ ବର୍ଷ ମଣ୍ଡପରେ ପୂଜା ପାଉଥିବା ମା ଦୁର୍ଗାଙ୍କ ଦର୍ଶନ ନିମନ୍ତେ ଦୂରଦୂାରାନ୍ତରୁ ଆସୁଥିବା ବହୁଭକ୍ତଙ୍କ ସମାଗମ ରହିଥାଏ । ହେଲେ ଚଳିତ ବର୍ଷ କୋଭିଡ କଟକଣା ପାଇଁ ଭକ୍ତଙ୍କ ଦର୍ଶନ ପାଇଁ କମିଟି ପକ୍ଷରୁ କଡ଼ାକଡ଼ି ବ୍ୟବସ୍ଥା କରାଯାଇଛି । ଏଥିସହ ଅନେକ ଭକ୍ତ କଟକଣା ପାଇଁ ଠିକ୍ ଭାବେ ମା’ଙ୍କ ଦର୍ଶନ ନପାଇ ନିରାଶ ହୋଇ ଘରକୁ ଫେରୁଥିବା ଦୃଶ୍ୟ ଦେଖିବାକୁ ମିଳିଛି ।
