ଧର୍ମଶାଳା : ଆଜି ଯାଜପୁର ଜିଲା ଧର୍ମଶାଳା ଥାନା ଅନ୍ତର୍ଗତ ଗଡମଧୁପୁର ଷ୍ଟେସନରେ ଅଘଟଣ । ଟ୍ରେନ ଚକାରେ ପେଡା ବ୍ୟବସାୟୀଙ୍କ ଦୁଇ ଗୋଡ କଟିଗଲା । ଯାହାକୁ ନେଇ ସ୍ଥାନୀୟ ଅଂଚଳରେ ଚର୍ଚ୍ଚା ବିଷୟ ପାଲଟିଛି । ପେଡା ବ୍ୟବସାୟୀ ଜଣକ ହେଲେ ଧର୍ମଶାଳା ବ୍ଲକ ଥାନୁଆଳ ଗ୍ରାମର ଗୁଣନିଧି ଦୋରା(୫୫) ବୋଲି ଜଣାପଡିଛି । ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି । ସୂଚନା ଅନୁଯାୟୀ ସବୁ ଦିନ ପରି ଗଣନିଧି ବିଭିନ୍ନ ଟ୍ରେନରେ ଯାଇ ପେଡା ବ୍ୟବସାୟ କରୁଥିଲେ । ଆଜି ସକାଳେ ସେ ଗଡମଧୁପୁର ଷ୍ଟେସନକୁ ଯାଇ ପୁରୀ-ହାଓଡା ଟ୍ରେନରେ ଚଢୁଥିବା ସମୟରେ ତାଙ୍କର ଅସାବଧାନତା ହେତୁ ଖସି ପଡିଥିଲେ । ଏହି ସମୟରେ ଟ୍ରେନ ଛାଡି ଦେଇଥିବା ସମୟରେ ଚକା ତଳେ ଦୁଇଟି ଗୋଡ ରହିଯାଇଥିଲା । ଫଳରେ ତାଙ୍କର ଦୁଇଟି ଗୋଡ କଟିଯାଇଥିଲା । ସ୍ଥାନୀୟ ଲୋକେ ଓ ରେଳବିଭାଗ କର୍ମଚାରୀ ତାଙ୍କୁ ସଂଗେ ସଂଗେ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ସେଠାରେ ତାଙ୍କର ଅବସ୍ଥା ସଂକଟାପନ ହେବାରୁ କଟକ ବଡ ମେଡିକାଲକୁ ପଠାଇ ଦିଆଯାଇଥିବା ଜଣାପଡିଛି । ଗୁରୁତର ଗୁଣନିଧିଙ୍କ ପରିବାର ଅତ୍ୟନ୍ତ ଗରୀବ ଶ୍ରେଣୀର ହୋଇଥିବାରୁ ତାଙ୍କୁ ତୁରନ୍ତ ସରକାରୀ ସହାୟତା ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି ।
