ଢ଼େଙ୍କାନାଳ– ଢ଼େଙ୍କାନାଳ ବନଖଣ୍ଡ ଅନ୍ତର୍ଗତ ହିନ୍ଦୋଳ ବନାଚଂଳ ବେଡ଼ାପଡ଼ା ଗ୍ରାମ ନିକଟରେ ଗତକାଲି ବିଳମ୍ବିତ ରାତିରେ ଦନ୍ତା ହାତୀ ଆକ୍ରମଣରେ ଜଣେ ଚାଷୀଙ୍କ ମୃତ୍ୟୁ ଘଟିଛି । ବାବନ୍ଧ ଫରେଷ୍ଟ ସେକ୍ସନର ବେଡ଼ାପଡା ବିଲମାଳରେ ହାତୀଟି ଚାଷୀଙ୍କୁ ଦଳି ଦେଇଛି । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି । ମୃତ ଚାଷୀ ଜଣକ ବେଡ଼ାପଡା ଗ୍ରାମର ଭୋଳେଶ୍ୱର ଦେହୁରୀ ବୋଲି ଜଣାପଡିଛି ।
ରବିବାର ରାତିରେ ଭୋଳେଶ୍ୱର ଓ ଅନ୍ୟ ଜଣେ ଚାଷୀ କ୍ଷେତକୁ ପାଣି ଦେଖିବାକୁ ଯାଇଥିବା ବେଳେ ହାତୀଟି ତାଙ୍କୁ ଅତର୍କିତ ଭାବେ ଆକ୍ରମଣ କରିଥିଲା । ତେବେ ଅନ୍ୟ ଚାଷୀ ଜଣକ ହାତୀ ଆକ୍ରମଣରୁ ଅଳ୍ପକେ ବର୍ତି ଯାଇଥିବା ବେଳେ ହାତୀ ହାବୁଡ଼ରେ ପଡି ଯାଇଥିଲେ ଭୋଳେଶ୍ୱର । ଫଳରେ ହାତୀଟି ତାଙ୍କୁ ଧାନ କ୍ଷେତ ମଧ୍ୟରେ ଦଳି ଦେଇଥିବା ଦେଖିବାକୁ ମିଳିଛି । ଖବର ପାଇ ଆଜି ସକାଳେ ସ୍ଥାନୀୟ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଂଚି ମୃତ ଚାଷୀଙ୍କ ଶବ ଉଦ୍ଧାର କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ପଠାଇଛନ୍ତି । ଘଟଣା ପରେ ସେଠାରେ ଚାପା ଉତେଜନା ପ୍ରକାଶ ପାଇଛି ।
