ଭୁବନେଶ୍ୱର – ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି)ତରଫରୁ ଓଡ଼ିଶାର ବିଭିନ୍ନ ସ୍ଥାନରେ ଗାନ୍ଧୀଜୀ ଓ ଶାସ୍ତ୍ରୀଜୀଙ୍କ ଜୟନ୍ତୀ ପାଳିତ ହୋଇଯାଇଛି ।
ରାଜ୍ୟର ବିଭିନ୍ନ କ୍ୟାମ୍ପସ୍ ଓ ନଗର ସ୍ତରରେ ବିଶିଷ୍ଟ ସ୍ୱାଧୀନତା ସଂଗ୍ରାମୀ ମୋହନ ଦାସ କରମ ଚାନ୍ଦ ଗାନ୍ଧୀଙ୍କ ୧୫୦ତମ ଜୟନ୍ତୀ ଓ ଭାରତର ଦ୍ୱିତୀୟ ପ୍ରଧାନମନ୍ତ୍ରୀ ଭାରତରତ୍ନ ଲାଲ୍ ବାହାଦୂର୍ ଶାସ୍ତ୍ରୀଙ୍କ ୧୧୬ତମ ଜୟନ୍ତୀ ଅବସରରେ ସେମିନାର୍, ପ୍ଲାଷ୍ଟିକ୍ ବର୍ଜ୍ଜନ ସଚେତନତା ଅଭିଯାନ, ପଥପ୍ରାନ୍ତ ନାଟକ, ବୃକ୍ଷରୋପଣ ଓ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇଛି । ଭୁବନେଶ୍ୱରର ଜୟ ଭାରତ ଅଡ଼ିଟୋରିୟମରେ ସ୍ୱଦେଶୀ, ସ୍ୱରାଜ, ସ୍ୱାବଲମ୍ବନ ଓ ନିଶାମୁକ୍ତିକୁ ନେଇ ଏକ ସେମିନାର୍ ଆୟୋଜନ କରାଯିବା ସହ ମାଷ୍ଟର କ୍ୟାଂଟିନ୍ରେ ଏକ ପଥପ୍ରାନ୍ତ ନାଟକ ମଧ୍ୟ କରାଯାଇଥିଲା । ସେହିପରି ନୟାଗଡ଼ ନଗର, ଭଦ୍ରକ ନଗର, ଫୁଲବାଣୀ ନଗର, ବ୍ରହ୍ମପୁର ନଗରରେ ଗାନ୍ଧୀ ଜୀ ଓ ଶାସ୍ତ୍ରୀ ଜୀଙ୍କ ପ୍ରତିମୂର୍ତିରେ ମାଲ୍ୟାର୍ପଣ କରାଯିବା ସହ ସ୍ୱଚ୍ଛ ଭାରତ ଅଭିଯାନ କରାଯାଇଥିଲା । କଟକ ଓ କିଶୋରନଗର ଶାଖାରେ ବୃକ୍ଷରୋପଣ କରାଯାଇଥିବାବେଳେ ବାଣପୁର-ବାଲୁଗାଁ ନଗର ଶାଖାରେ ପ୍ଲାଷ୍ଟିକ୍ ବର୍ଜ୍ଜନ ପାଇଁ ନଗର ମଧ୍ୟରେ ସଚେତନତା ଯାତ୍ରା ଆୟୋଜିତ ହୋଇଥିଲା ।
କନ୍ଧମାଳର କୁଇଦାନ ଆଚଂଳିକ ମହାବିଦ୍ୟାଳୟ, ଭବାନୀପାଟଣା ସରକାରୀ ସ୍ୱୟଂଶାସିତ ମହାବିଦ୍ୟାଳୟ, ଡିଏଭି କଲେଜ୍, ଟିଟିଲାଗଡ଼ ଓ ହିଞ୍ଜିଳିକାଟୁରେ ସେମିନାର୍ ଆୟୋଜନ ହେବା ସହ ଗାନ୍ଧୀ ଓ ଶାସ୍ତ୍ରୀ ଜୀଙ୍କ ବିଚାରଧାରା ଓ ଆଜିର ଦିନରେ ପ୍ରାସଙ୍ଗିକତା ସଂପର୍କରେ ଆଲୋକପାତ କରାଯାଇଥିଲା ।
