ଶିକ୍ଷୟିତ୍ରୀଙ୍କୁ ଅସଦାଚାରଣ ଅଭିଯୋଗ, କିରାଣୀ ଗିରଫ

ରାୟଗଡ଼ା – ଜଣେ ହାଇସ୍କୁଲ ଶିକ୍ଷୟିତ୍ରୀଙ୍କୁ ଅସଦାଚାରଣ ସହ ମୋବାଇଲ୍ ରେ ତାଙ୍କ ସହିତ ଅଶ୍ଳିଳ କଥାବାର୍ତା କରିବା ଅଭିଯୋଗରେ ରାୟଗଡ଼ା ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟର ଜଣେ କିରାଣୀଙ୍କୁ ଗିରଫ କରାଯାଇଛି । ତାଙ୍କ ନାମ ସତ୍ୟ ନାରାୟଣ ବିଶୋୟୀ  ।ସୂଚନା ଅନୁସାରେ, ସମ୍ପୃକ୍ତ ଶିକ୍ଷୟତ୍ରୀଙ୍କୁ ପୂର୍ବରୁ କୌଣସି ଘଟଣାରେ ନିଲମ୍ବିତ କରାଯାଇଥିଲା  । ଚାକିରୀରେ ପୁନଃ ଥଇଥାନ କରାଇଦେବାକୁ ପ୍ରତିଶୃତି ଦେଇ ସତ୍ୟ ନାରାୟଣ ବିଭିନ୍ନ ସମୟରେ ତାଙ୍କୁ ମାନସିକ ନିର୍ଯାତନା ଦେଇ ଆସୁଥିବା ଶିକ୍ଷୟିତ୍ରୀ ଜଣକ ଅଭିଯୋଗ କରିଛନ୍ତି  । କାମ କରାଇଦେବାକୁ କହି ସେ ତାଙ୍କୁ ଘରକୁ ଡାକିବା ସହ ଫୋନ୍ ଯୋଗେ ଅଶ୍ଳିଳ କଥାବାର୍ତା କରୁଥିବା ମଧ୍ୟ ଅଭିଯୋଗ ହୋଇଛି  । ଏନେଇ ଶିକ୍ଷୟିତ୍ରୀ ଜଣକ ଆଜି ଜିଲ୍ଲାପାଳଙ୍କୁ ଭେଟିବା ସହ ରାୟଗଡ଼ା ଥାନାରେ ଏକ ଲିଖିତ ଅଭିଯୋଗ କରିଥିଲେ  । ଏହି ମାମଲାରେ ରାୟଗଡ଼ା ପୋଲିସ ସତ୍ୟନାରାୟଣଙ୍କୁ ଗିରଫ କରି ଘଟଣାର ତଦନ୍ତ ଚଳାଇଛି  । ଅନ୍ୟପକ୍ଷରେ ଏହା ତାଙ୍କ ବିରୋଧରେ ଏକ ଚକ୍ରାନ୍ତ ବୋଲି ସତ୍ୟ ନାରାୟଣ କହିଛନ୍ତି  ।